"Hər iki xalq bu müharibədən yorulub, sülh prosesi əmin-amanlıq gətirəcək" - Ekspert

Azərbaycan ardıcıl olaraq siyasi iradə nümayiş etdirib və intensiv şəkildə birbaşa danışıqları dəstəkləyib, həmçinin Ermənistanla sülh sazişinin tezliklə imzalanmasını gözləyir. Bunu Azərbaycanın xarici işlər naziri Ceyhun Bayramov Bakıda Türkiyə və gürcüstanlı həmkarları Hakan Fidan və İliya Darçiaşvili ilə keçirilən görüşü zamanı bildirib. Onun sözlərinə görə, son vaxtlar iki ölkə liderləri səviyyəsində, eləcə də Azərbaycan və Ermənistanın xarici işlər nazirləri səviyyəsində görüşlər keçirilib: "Bu görüşlər sülh sazişinin irəliləməsi məsələsində zəmin yaradır və iki ölkənin siyasi məsələlərinə yanaşmanın sadəliyini təmin edir".

Azərbayca və Ermənistan arasında sülh prosesi yaxın vaxtlarda imzalana bilərmi

Məsələ ilə bağlı hərbi ekspert Tərlan Eyvazov Sonxeber.az-a açıqlama verib.

O bildirib ki, sülh prosesi hər iki ölkəyə əmin-amanlıq gətirəcək:

"Bütün Avropanın, Azərbaycan və Ermənistan arasında sülhü istəməyən ölkələrin mətbuatlarında, guya Azərbaycan və Ermənistan arasında yaxın vaxtlarda döyüşlərin olacağı ilə bağlı dezinformasiyalar dərc olunurdu. Amma təbii ki, hər iki ölkənin xalqı və siyasətçiləri bunun iki dövlətə də ancaq ziyan gətirəcəyini bilir. Eyni zamanda iki tərəfində rəhbərliyində sülh danışıqlarının davam etdirilməsi üçün həvəs və istək var.

Müharibənin olacağını və bunu Azərbaycan tərəfinin başladacağını deyən şəxslərin və dairələrin "arzusunu gözündən qoymaq"dan ötəri Azərbaycan tərəfi konkret hərəkətə keçib. Biz bunu danışıqlarda iştirak edən şəxslərdən də eşidirik. Əgər bu yaxın zamanlarda sülh imzalanmasa belə, iki dövlət arasında münasibətlərin irəliləməsi mümkündür. Bu irəliləyişin özü də az iş deyil. Ən əsası danışıqlarda bir qədər də irəliyə getməyinin nəticəsi olaraq, biz iki xalq arasında 30 ildiən artıq davam edən bu münaqişənin artıq arxa plana keçəcəyini görəcəyik. Bu isə olduqca böyük addımdır. Çünki uzun illərdir davam edən münaqişəni qısa müddət ərzində bitə biləcəyini düşünmək düzgün deyil. Amma bu danışıqlarda XİN başçısı Ceyhun Bayramovun verdiyi bəyanatlar olduqca önəmlidir.

Hər iki xalq bu müharibədən yorulub. Sülh prosesi bizə əmin-amanlıq gətirəcək. İnsanlarımızın işğaldan azad edilmiş ərazilərə qayıdışını sürətləndirəcək" .

Telegramda izləyin