"Bu gün keçmiş məcburi köçkünlərimiz Novruz bayramını doğma yurdlarında qeyd etmə həyəcanını yaşayır" - DEPUTAT

"Novruz bayramını siyasi baxışlarından, siyasi dünyagörüşündən asılı olmayaraq hamı bayram edir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Novruz bayramında insanlar kin-küdurəti unudur, küsülülər barışır və ziddiyyətlər aradan götürülür:

"Novruz dostluq və həmrəylik bayramıdır. Bu bayram yaranandan onun xüsusiyyətləri insanları həmişə dostluğa, həmrəyliyə və qarşılıqlı anlaşmaya dəvət edibdir. 44 günlük Vətən müharibəsində Müzəffər Ali Baş Komandan İlham Əliyev Ümummilli Liderin vəsiyyətini və Azərbaycan xalqının arzularını reallaşdırdı. Ali Baş Komandanın rəhbərliyi altında Müzəffər Azərbaycan Ordusu doğma torpaqlarımızı işğaldan azad etdi və biz artıq həmin ərazilərdə Novruz bayramını qeyd edirik. Artıq 4 ildir ki, biz bütün bayramları, eləcə də Novruz bayramını qalib xalqın nümayəndələri kimi qeyd edirik".

Deputat vurğulayıb ki, beynəlxalq müstəvidə Novruz bayramının tanıdılmasında Azərbaycanın Birinci vitse-prezidenti Mehriban xanım Əliyevanın zəhmətləri böyükdür:

"Mehriban xanımın böyük səyi nəticəsində Novruz bayramı UNESCO tərəfindən Qeyri-Maddi Mədəni İrs üzrə Reprezentativ siyahısına daxil edilib. 28 sentyabr - 2 oktyabr 2009-cu ildə Birləşmiş Ərəb Əmirliklərinin Abu-Dabi şəhərində keçirilmiş UNESCO-nun Qeyri-Maddi Mədəni İrs üzrə Hökümətlərarası Komitəsinin 4-cü Sessiyası çərçivəsində qəbul edilmiş qərara əsasən, Novruz çoxmillətli (Azərbaycan, Türkiyə, Özbəkistan, Qırğızıstan, Pakistan, Hindistan, İran) nominasiya kimi UNESCO-nun Qeyri-Maddi Mədəni İrsin Reprezentativ siyahısına salınıb. əyəri. İslamdan əvvəl tarixi dövrə təsadüf olunan Novruz bayramı Azərbaycanla yanaşı bütün Şərqdə qeyd olunur. Novruz təkcə onu keçirən türk xalqlarının deyil, ümumilikdə bəşəriyyətin mənəvi dəyəri hesab edilir. 23 fevral 2010-cu ildə BMT Baş Assambleyasının 64-cü sessiyasının iclasında martın 21-i "Beynəlxalq Novruz Günü" elan olunub. 28 noyabr - 2 dekabr 2016-cı il tarixlərində Efiopiyanın Əddis-Əbəbə şəhərində keçirilmiş UNESCO-nun Qeyri-Maddi Mədəni İrs üzrə Hökumətlərarası Komitəsinin 11-ci sessiyasında İraq, Qazaxıstan, Tacikistan, Türkmənistan və Əfqanıstan da Novruz bayramı nominasiyasına qoşulub".

Deputat söyləyib ki, 4 il bundan öncə məcburi köçkünlərimiz hər bayram ərəfəsində deyirdilər ki, inşallah gələn il bayramı doğma yurdumuzda, Qarabağda qeyd edərik:

"Soydaşlarımızın bu arzusunu Ali Baş Komandan İlham Əliyevin rəhbəri ilə Müzəffər Azərbaycan Ordusu reallaşdırdı. 4 ildir ki, bu gözəl bahar bayramını biz işğaldan azad edilmiş torpaqlarda qeyd edirik. Bu gün bir çox keçmiş məcburi köçkünlərimiz Novruz bayramını doğma yurdlarında qeyd etmə həyəcanını yaşayır".

Telegramda izləyin