Ailə başçısını itirməyə görə müavinət 500 manata qaldırılır? - AÇIQLAMA

Qanunvericiliklə Vəfat etmiş şəxsin uşaqlarına - 18 yaşına çatanadək (əyani təhsil alanlara təhsili bitirənədək) 120 manat müavinət verilir. Sözügedən müavinətin məbləği 120 manatdır. Bildiyimiz kimi, ailə başçısını itirmiş qadınlar bu gün uşaqların ehtiyaclarını qarşılamaqda çətinlik çəkirlər. Hətta çox ekspertlər deyir ki, ana çalışsa belə onun qazancı həyat yoldaşının gəliri ilə bir deyil. Ananın aylıq qazancı uşaqların ehtiyaclarını tam təmin edə bilmir. Bu baxımdan vəfat etmiş şəxslərin övladlarına verilən 120 manat 500 manata qədər qaldırıla bilər?

Mövzu ilə bağlı Sonxeber.az-a danışan sosioloq Rəşad Əsgərov deyir ki, Azərbaycanda verilən sözügedən müavinət mövzu üzrə məbləğ nə qədər artsa da insanları qane eləmir və azlıq təşkil edir:

"Artırsalar belə bunu 15-50 faiz etibarilə edə bilərlər. O məbləğdə uşaqlara müəyyən qədər problemlərin həlli istiqamətində o qədər rol oynamır. Amma ailə başçısını itirənlərə yaşayış minimumu qədər verirlər. O müavinət bazar iqtisadiyyatı şəraitində ailələrin dayanıqlılığını və uşaqların təminatının ödənməsində o qədər də rol oynamır. Bununla bağlı hər il plenar iclaslar və büdcə müzakirələri öncəsi təkliflər irəli sürülür. Təkliflərin irəli sürülməsi yaxud problemin qaldırılması istiqamətində müəyyən qədər artımlara gətirib çıxarmır. Çünki büdcə zərfində xüsusilə sosial müdafiə sahəsində ayrılan vəsaitlərə baxırlar. Vəsaitlərin bölgüsündə, xüsusilə xərc bölməsində ailə başçısını itirməyə görə və digər kateqoriyalardan olan insanlara verilən müavinətlərdə bölgü elə aparılmalıdır ki, ədalətsizlik olmasın. Digər sahələr və kateqoriyalar arasında faiz nisbətində uçurum olmamalıdır. Ona görə də bu sahədə aparılan müəyyən qədər islahatlar hələ ki, öz nəticəsini vermir. 2-3 il ərzində bunun baş verməsi üçün köklü dəyişikliklər aparılmalıdır. Ailə başçısını itirmiş və valideyn himayəsindən məhrum olmuş uşaqların təminatının ödənilməsi istiqamətində dəyişikliklər aparılmalıdır.

Sosioloqun sözlərinə görə, hazırda mövcud məbləğin 500 manata qaldırılması yenə də valideynləri və tək anaları qane etməyəcək. Çünki bazarın tələb-təklif xüsusiyyətləri var:

" Bu məbləğ insanların tam təminatını ödəməyə yox, minimum ehtiyaclarını ödəməyə hesablanır. Əgər bu gün həmin kateqoriyadan olan insanlara həmin məbləğ veriləcəksə, o zaman digər müavinətlərin məbləği məcbur olaraq artırılmalıdır. Dövlətin büdcəsində bu sahəyə o qədər pul ayırmağa imkanı olmur. Faiz göstəricisi və kvota, bölgü əsasında təkcə ailə başçısını itirməyə görə yox, digər sahələrdə olan sosial müavinətlərin artmasına gətirib çıxarmalıdır. Belə olan halda kompleks şəkildə problemi həll etmək üçün dövlət büdcəsində bu sahəyə olan vəsait 2-3 dəfə artmalıdır ki, məsələ kökündən həll olsun. Mən inanıram ki, yaxın 1-2 il ərzində birdəfəlik həll olunsun. Müvəqqəti olaraq islahatlar şəklində bu məbləğ artacaqdır. Amma inflyasiya olduqca bu məbləğlərin artırılması istiqamətində müsbət dinamika yaranmır".

Sevda Səfərova

Telegramda izləyin