Lift qəzasında ölən yeniyetmənin ailəsi üsyan etdi

Ankarada baş verən hadisədə liftdə sıxılmış vəziyyətdə qalan Beren Su Bolatın xilasetmə işləri zamanı liftin şaxtasına düşərək ölməsi ilə bağlı aparılan istintaqda ekspertiza rəyi hazırlanıb.

Sonxeber.az türk mediasına istinadən xəbər verir ki, iyulun 23-də Ankaranın Sincan səmtinin Fevzi Çakmak məhəlləsində baş verən faciəvi hadisədə Beren Su Bolat sinif yoldaşının yaşadığı binanın liftində sıxılmış vəziyyətdə qalıb. Xilasedicilərin müdaxiləsi zamanı liftin şaxtasına düşən Beren Su həyatını itirib, rəfiqəsi isə son anda xilas edilib.

Hadisədən sonra təqsirləndirilən şəxslər barəsində araşdırmalara başlanılıb. Xilasedicilər rəisi E.A. və xilasedicilər B.Y. və B.B barələrində "ehtiyatsızlıqdan ölümə səbəb olma" maddəsi ilə araşdırma başlanılıb və onlar vəzifələrindən kənarlaşdırılıblar.

Qəza ilə bağlı hazırlanan ekspertiza rəyində məlum olub ki, sadə təhlükəsizlik tədbirləri ilə hadisənin qarşısını almaq olardı. Xəbərdə liftdə sıxılmış vəziyyətdə qalan uşaqların xilas edilməsi zamanı lazımi təhlükəsizlik tədbirlərinin görülmədiyi və qəzanın məhz bu ehtiyatsızlıq nəticəsində baş verdiyi bildirilib. Hesabatda liftin texniki xidmət müddətinin də keçdiyi vurğulanıb. Qəzanın baş verdiyi liftin ətrafında heç bir xilasetmə təlimatının olmadığı da bildirilib.

Beren Su'nun atası Özkan Bolat, "Liftlərin texniki xidmət müddəti var, lakin 18 gündür baxım müddəti keçib. Bununla bağlı hüquqi proses başlayacaq. Məsul olanlar lazımi cəzanı almalıdır. Mən səhlənkarlıq deməyəcəm, bu bir qətldir", - deyə bildirib.

Beren Su'nun anası Ayşə Bolat qızı ilə etdiyi son telefon danışığından danışaraq, "Beren mənə zəng edib, "Liftdə ilişib qaldıq" dedi. Daha əvvəl də bir neçə dəfə olub. Sonra yenə Beren zəng edib dedi ki, "Ana, başqa yerdən gələcəklər, bizi çıxaracaqlar". 15 saniyə sonra yenidən zəng etdim ki, getmisən? Bütün bunlar çox qısa müddətdə baş verdi. Biz gedəndə xilasedicilər var idi. "Beren" deyə səsləndim. Qapıdakı kişi mənə dedi: "Uşağı tuta bilmədilər". Onun arzuları var idi, plastik cərrah olmaq istəyirdi" , - deyə bildirib.

Telegramda izləyin