Ad günündə torpağa tapşırıldı

Aksarayda nənəsi Selver Karataş (60) ilə yolu keçmək istəyərkən mikroavtobusun vurduğu Damla Yağmur (2) ad günündə son mənzilə yola salınıb.

Sonxeber.az türk mediasına istinadən xəbər verir ki, qəza dünən saat 19.30-da Cümhuriyyət Məhəlləsində baş verib.

Çaban Mercanın (65) idarə etdiyi avtobus yolu keçmək istəyən Selver Karataş və nəvəsi Damla Yağmuru vurub.

Vətəndaşlar polis və təcili tibbi yardıma xəbər veriblər. Təcili tibbi yardım əməkdaşları tərəfindən aparılan yoxlama zamanı Damla Yağmurun öldüyü müəyyən edilib. Ağır xəsarətlərlə xəstəxanaya yerləşdirilən Selver Karataşsa xəstəxanada dünyasını dəyişib. Qəza xəbərindən sonra hadisə yerinə gələn Abdullah Karataş həyat yoldaşı və nəvəsinin öldüyünü eşidəndə huşunu itirib.

Ağlayan Karataş "Nəvəmin atası bu yaxınlarda öldü, indi nə edim?" , - deyə bildirib.

Qəza xəbərini eşidən Damlanın anası Gülizar Yağmur (32) xəstəxanaya gedib və kədərli xəbəri orada alıb. Yağmurun həyat yoldaşı Hüseyn Yağmurun bir il əvvəl beyin qanamasından öldüyü öyrənilib. Gülizar Yağmurun əri vəfat etdikdən sonra 2 qızı ilə ailəsi ilə birlikdə qaldığı bildirilib.

Yarılmadan sonra Damla Yağmurun cənazəsi səhər saatlarında yaxınları tərəfindən Çekiçlər kəndinə aparılıb. Meyit basdırılarkən bu gün Damla Yağmurun doğum günü olduğu öyrənilib. Selver Karataşın bu gün torpağa tapşırılacağı bildirilib.

Saxlanılan sürücü ilə bağlı prosedurlar davam edir.

Telegramda izləyin