Rusiya OYUNA QATILDI: Oktyabr ayında bizi NƏ GÖZLƏYİR? - ŞƏRH

Son zamanlar Rusiya Zəngəzur dəhlizinin açılması ilə bağlı fikirlər səsləndirilir. Prosesdə isə Rusiyanın Türkiyə ilə yaxınlaşmaq cəhdlərini görürük. Hətta rəsmi Tehran Rusiyaya bu dəhlizin açılması ilə bağlı aktivliyinə görə xəbərdarlıq edib. Rusiyanın Zəngəzur dəhlizinin açılması məsələsində aktivləşmə səbəbi nə ilə bağlıdır? Rusiyanın iştirakı ilə Zəngur dəhlizinin açılmasını təmin edə bilərikmi? Eyni zamanda deyə bilərikmi ki, həm də bu yolla Putin Paşinyanı cəzalandırmağa çalışır?

Mövzu ilə bağlı Sonxeber.az-ın suallarını cavablandıran hərbi ekspert Səxavət Məmməd deyib ki, Rusiya əvvəllər Zəngəzur dəhlizi ilə bağlı passiv mövqedə idi. Son dönəmlər Zəngəzur ilə əlaqədar aktiv fəzaya keçib. Bu yöndə ciddi açıqlamalar verir və fikirlər səsləndirirlər. Təzyiqi isə artırmağa başlayıblar:

"Rusiya bir sıra detalları əsas kimi gətirir. Rusiya tərəfi 10 noyabr bəyanatına görə Zəngəzur dəhlizində təhlükəsizliyi təmin edəcək qüvvə olmalı idi və bu yöndə fəaliyyət göstərəcəkdi. Rəsmi Moskva bunun fərqindədir. 10 bəndin 8 maddəsi yerinə yetirilib. Sadəcə olaraq 9-cu bənd yerinə yetirilməyib. Təxminən 2025-ci ilin may ayında qərar verilməli idi ki, Rusiya sülhməramlıları ərazidə qalacaq yoxsa yox. Yəni əslində bu qərar olmayanda sonra bəyannamə qüvvədən düşə bilər. Rusiya tələsir və açıq şəkildə məsələni qısa zamanda həll etməyə çalışır. Ona görə də həm gərginlik yaranmağa başlayır, həm də bəzi ölkələr bu məsələ ilə bağlı narahat olduqlarını dilə gətirirlər. Rusiya düşünür ki, Fransa və Amerika Ermənistanda möhkəmlənməyə başlayıb. Zəngəzur dəhlizi açılsa da onların nəzarəti altında açılmasını istəyirlər. Rusiya da bunu fərqindədir".

Ekspertin sözlərinə görə, Rusiya açıq şəkildə bu oyuna qatılaraq Paşinyan hökumətini cəzalandıracaq:

"Oktyabrda Gürcüstanda qarşıdurmanın olma ehtimalı yüskək göstərilir. Bundan əlavə Ermənistanda da bu yöndə nəsə baş vermə ehtimalı yüksəkdir. Rusiya proseslərin aktiv iştirakçısı olacaq və onun Ukrayna müharibəsində mövqelərində möhkəmlənməsi, hücumlarının aktivləşdirməsi, Ukrayna tərəfinin isə müqavimət göstərməkdə çətinlik çəkməsi Rusiyanın əlini bir qədər də gücləndirir. Rəsmi Moskva artıq Cənubi Qafqaz regionuna baxmağa başlayıb. Əvvəllər bütün proses Azərbaycana yüklənmişdi və dəhlizi Azərbaycan açmalı idi. Amma indi mənzərə dəyişib. Bu Azərbaycana sərf edən bir məsələdir. Elə bir vəziyyət yarandı ki, prosesin içərisində bu yolda kimin nəzarət edəcəyi ilə bağlı suala aydınlıq gələcək. Azərbaycan burada rahatdır. Çünki rəqiblər məlumdur: Amerika, Rusiya və Fransa. Bunlar əsas rəqiblərdir və təzyiqi isə Rusiya artıracaq".

Səxavət Məmməd qeyd edib ki, heç kim məğlub olmaq istəməyəcək və geri addım atmayacaqlar. Çalışacaqlar ki, bu məsələdə hərbi gərginlik olsun. Azərbaycan üçün mənfi təsir bu ola bilər:

"Yəni hərbi gərginliyin yaranma ehtimalı var. Azərbaycan və Ermənistanı bu məqamda toqquşdura bilərlər. Hesab edirəm ki, indiki məqamda Tehranda narahatdır və bunu anlamaq lazımdır. Türkiyə üçün isə nəzarətin kimdə olacağının heç bir fərqi yoxdur. Onlar üçün əsas olan bu yolun açılmasıdır. Əslində bir çox ölkə dəhlizin açılmasında maraqlıdır. Türkiyə Rusiyanın bunu etmək şansını daha yüksək görür. Ona görə bu yöndə Rusiya və Türkiyənin yaxınlaşdığını görürük. Bu baxımdan müəyyən addımlar atılır. Oktyabr ayından başlayaraq məsələyə aydınlıq gətiriləcək".

Sevda Səfərova

Telegramda izləyin

instagramda izləyin