Təxribatlar davam edərsə Azərbaycan Naxçıvan istiqamətində əks-hücum əməliyyatlarına başlayacaq? - AÇIQLAMA

Sentyabrın 11-i saat 10:50 radələrində Azərbaycan Ordusunun Naxçıvan Muxtar Respublikasının Sədərək rayonunun Heydərabad yaşayış məntəqəsi istiqamətində yerləşən mövqeləri Ermənistan silahlı qüvvələrinin bölmələri tərəfindən üzbəüz mövqelərdən atıcı silahlar vasitəsilə atəşə tutulub. Bəs görəsən Ermənistan atəşkəsi pozmağa davam edərsə, Azərbaycan əks-hücuma keçəcəkmi?

Mövzu ilə bağlı Sonxeber.az – açıqlama verən hərbi ekspert Səxavət Məmməd bildirib ki, Azərbaycan tərəfi atəşkəsin pozulma hallarına hələki səbrlə yanaşır:

"Son dönəmlər Ermənistan tərəfi Naxçıvan istiqamətinndə atəşkəsi tez-tez pozmağa başlayıb. Bunun səbəbi Ermənistan tərəfinin kəşfiyyat xarakterli məlumatlar əldə etmək istəməsidir. Onlar ordakı bölmələrin vəziyyətini öyrənmək istəyir. Digər səbəbi isə, Ermənistanın müharibəyə hazır olduğunu bildirmək istəyidir. Onlar müttəfiq olduqları dövlətlərlə birgə Azərbaycana təzyiq olaraq bu addımı atır. Azərbaycan tərəfi isə atəşkəsin pozulma hallarına hələki səbrlə yanaşır. Çünki Azərbaycan tərəfi düşünür ki, əgər indiki məqamda sadəcə atəşkəsin pozulmasına sərt reaksiya verərsə, tələyə düşmüş olar və Azərbaycana qarşı çox ağır sanksiyalar tətbiq edilə bilər. Buna görə də Azərbaycan tərəfi hələki səbr nümayiş etdirir. Amma bunun sona qədər belə davam edəcəyini düşünmürəm. Əgər atəşkəsin Ermənistan tərəfindən pozulması nəticəsində Azərbaycan tərəfi şəhid verərsə, postlarımız dağıdılarsa mövqelərimizə basqın edilərsə, təbii ki, Azərbaycan tərəfi səbirli davranmayacaq. Ordumuz qarşı tərəfin mövqelərini həm dəqiq silahlarla, həm də havadan pualar vasitəsi ilə vurub sıradan çıxara bilər. Və ya konkret olaraq qərar verilə bilər ki, sərhəddin təhlükəsizliyini təmin etmək üçün buferzona yaradılsın".

Ekspert həmçinin bildirib ki, Cənubi Qafqaz ölkələrini gələcəkdə ağır sınaqlar gözləyir:

"Ümumiyyətlə regionda baş verən proseslərə region dövlətlərindən kənar gözlə baxmaq lazımdır. Burda qərb və Rusiya faktoru çox önəmlidir. Onlar region uğrunda ciddi şəkildə mübarizənin içərisindədirlər. Onların bu prosesi hara qədər qaldıracaqlarını isə indidən demək o qədər də asan deyil. Amma son günlər baş verən proseslərdə onu görürük ki, diplomatlarla yanaşı, Ermənistan və Azərbaycanın Müdafiə Nazirləri də müxtəlif dövlətlərə səfərlər təşkil edirlər. Bu o deməkdir ki, tərəflər dostlarını, müttəfiqlərini müəyyənləşdiririlər. Əgər region uğrunda mübarizədə qərblə Rusiya hansısa bir formada anlaşmasa, bu regionda toqquşmaların olması ehtimalı yüksələcək. Təbii ki, qüvvələr nisbəti Azərbaycanın xeyrinədir. Ermənistanın Azərbaycan ordusunun qarşısında davam gətirmə ehtimalı azdır. Amma prosesin sonu ağır və dözülməz bir hal da ala bilər. Region iflic ola bilər. Çünki region uğrunda mübarizə aparan ölkələr son dərəcə böyükdür və onların maraqlarından vaz keçəcəyini də düşünmürəm. Buna görə Cənubi Qafqaz ölkələrini gələcəkdə çox ağır sınaqlar gözləyir".

Çiçək Sadatova

Telegramda izləyin

instagramda izləyin