Köpək balığı 68 yaşlı qadını parçaladı - VİDEO

İndoneziyada 68 yaşlı amerikalı turist Kollin Monfor Pulau Reonq adasının yaxınlığında suya dalış edərkən köpək balığı tərəfindən parçalanıb.

Sonxeber.az xarici mediaya istinadən xəbər verir ki, 6 dostu ilə suya dalış edən Monforu qəfildən güclü dalğa aparıb. Tur bələdçisinin və dostlarının bütün səylərinə baxmayaraq, Monfor qayığa geri çəkilə bilməyib. Çətin dəniz şəraiti və tapılma ehtimalının az olması səbəbindən səkkiz gün davam edən intensiv axtarış işləri oktyabrın 3-də dayandırılıb.

Hadisənin dəhşəti oktyabrın 8-də ortaya çıxıb. Qonşu Şərqi Timorda balıqçı tutduğu köpək balığının qarnında insan qalıqları tapıb. Liquisa County rəsmiləri meyitin üzərində qara dalğıc kostyumu parçaları aşkarlandığını açıqlayıb.

"Biz İndoneziyanın Dilidəki səfirliyi ilə əlaqə saxlayırıq. Meyitin İndoneziyada itkin düşdüyü bildirilən qadına aid olub-olmadığını araşdırırıq", - Alor Adaları Dəniz Parkının İdarə Heyətinin sədri Məhəmməd Saleh Qoro bildirib.

Monforun ailəsi və dostları üçün böyük faciə olan bu hadisə istirahət edənlərə təbiət qüvvələrinə qarşı diqqətli olmaları lazım olduğunu bir daha xatırladıb. Yerli hakimiyyət orqanları oxşar hadisələrin baş verməməsi üçün təhlükəsizlik tədbirlərini artıracaqlarını açıqlayıb.

Telegramda izləyin