Ata qumar borcları səbəbindən internetdə yeni doğulan körpəsini satdı

İndoneziyanın Tangeranq şəhərində 36 yaşlı ata yeni doğulan körpəsini Facebook vasitəsilə 700 sterlinə satıb.

Sonxeber.az xarici mediaya istinadən xəbər verir ki, körpənin anası evə qayıdıb uşağını tapa bilməyəndə hadisə üzə çıxıb. Təzyiq altında qalan ata körpəni satdığını etiraf edib. O bu əməli qumar borcları üzündən törətdiyini etiraf edib. Polis rəisi Zain Dwi Nugroho, "Kişi Facebook-da körpə axtaran cütlüklə əlaqə saxlayıb və satışı təşkil edib" deyə bildirib.

Polis körpəni Tangeranqdakı evdə tapıb və insan alverində şübhəli bilinən daha iki nəfəri həbs edib. İndoneziya qanunlarına görə cinayətkarları 15 ilə qədər həbs və 600 milyon rupiya cərimə gözləyir.

İndoneziyanın Uşaqların Müdafiəsi Komissiyasının rəhbəri Ai Maryati, "Uşaqlarla bu cür rəftar etmək üçün heç bir bəhanə yoxdur və onların hüquqlarının pozulması ciddi şəkildə cəzalandırılmalıdır" deyə bildirib.

Səlahiyyətlilər sosial media vasitəsilə əhalini bu cür qanunsuz satışlara qarşı xəbərdar edir və bu cinayətlərə qarşı mübarizəni davam etdirəcəklərini bildirirlər.

Telegramda izləyin