İnternetdən ayaqqabı sifariş verdi, evə gələn bağlamanı açanda şok oldu

Bristol Universitetində təhsil alan 18 yaşlı Sofiya Alonso-Mossinger məşhur internet saytından ayaqqabı sifariş verib.

Sonxeber.az xarici mediaya istinadən xəbər verir ki, evə gələn bağlamanı açan qız gözlərinə inanmayıb. Qutudan əqrəb çıxıb.

Qorxudan qışqıran Sofiya dərhal otaq yoldaşlarından kömək istəyib. Zoologiya tələbəsi Oliver Ceyms əqrəbi mətbəx maşası ilə tutaraq qutuya qoyub. Tələbələr nə edəcəklərini bilmədiklərindən əvvəlcə qutuda deşiklər açıb əqrəbə su veriblər.

Onlar daha sonra Milli Sürünən Rifah Mərkəzinə (NCRW) zəng ediblər. NCRW mütəxəssisi Kris Nyuman izah edib ki, əqrəb Olivierus martensii növüdür və Çin əqrəbi kimi də tanınır. O həmçinin deyir ki, bu növdən olan əqrəb sancmaları həyat üçün təhlükə yaratmır, lakin ciddi sağlamlıq problemləri yarada bilər.

Hadisədən sonra açıqlama verən Sofiya "Yuxu gördüyümü sandım. Hörümçəkləri sevsəm də, otağımda anidən əqrəb görmək qorxulu idi" deyə bildirib. Otaq yoldaşı Phoebe Hunt əvvəlcə əqrəbi öldürməyi düşündüklərini, lakin daha humanist bir həll yolu tapmağa qərar verdiklərini söyləyib.

NCRW bunun son bir ayda ikinci oxşar əqrəb hadisəsi olduğunu vurğulayıb.

Bu hadisə beynəlxalq elektron ticarət və daşınma proseslərində təhlükəsizlik tədbirlərinin nəzərdən keçirilməsi zərurətini bir daha gündəmə gətirib.

Telegramda izləyin