38 yaşlı qadın evdə saxladığı siçovulun onu dişləməsi səbəbindən dünyasını dəyişdi

İspaniyanın Vilyarreal şəhərində baş verən qeyri-adi hadisə ev heyvanları sahiblərini heyrətə salıb.

Sonxeber.az xarici mediaya istinadən xəbər verir ki, 38 yaşlı iki uşaq anası siçovulun dişləməsi nəticəsində ölüb. Hadisə axşam saat 22:30 radələrində baş verib. Kolumbiyalı qadın evdə saxladığı siçovulun onu dişləməsi səbəbi ilə tibbi yardım almaq üçün uşaqları ilə xəstəxanaya gedib. Lakin o, xəstəxananın qarşısında qəflətən yıxılıb.

Həkimlər dərhal müdaxilə etsə də, qadını xilas edə bilməyiblər. Polis hadisə yerini mühasirəyə alıb və araşdırmalara başlanılıb. Tibbi ekspertizanın nəticəsi ölümə səbəbin siçovul dişləməsi olub-olmadığını ortaya çıxaracaq.

Mütəxəssislər qeyd edirlər ki, siçovul dişləmələri nadir hallarda ciddi sağlamlıq problemləri yarada bilər. Quduzluq və bəzi bakterial infeksiyaların ötürülməsi riski var. Ona görə də dişləmə zamanı yaranın dərhal yuyulması məsləhət görülür.

Qeyd edək ki, oxşar hallar əvvəllər də olub. 2007-ci ildə İngiltərədə bir kişi siçovul dişləməsi nəticəsində anafilaktik şok keçirib. Bu hadisələr siçovul dişləməsinin allergik reaksiyalara səbəb ola biləcəyini göstərir.

Telegramda izləyin