Daha bir zorakılıq: uşaq baxçasında işləyən müəllim azyaşlını sillələdi

Qaziantepdə özəl uşaq bağçasında müəllim işləyən Betül K. 21 aylıq körpəyə sillə vurub.

Sonxeber.az türk mediasına istinadən xəbər verir ki, Pancarlı rayonunda özəl uşaq bağçasında müəllim işləyən Betül K. 21 aylıq M.D.Ö.-yə yatarkən sillə vurub.

Hadisədən sonra Betül K. uşağın anası Gündoğdu Özerə zəng edərək uşağın yana tərəf yatdığı üçün üzünə iz çıxdığını deyib. Ailə uşaq bağçasına gedib və körpənin üzündə barmaq izlərinin olduğunu görüb.

Bundan sonra övladının zorakılığa məruz qaldığını anlayan ailə əvvəlcə xəstəxanaya gedib, sonra isə polisə gedərək müəllimdən şikayət edib. Uşaq bağçasının təhlükəsizlik kamerası görüntülərində Betül K.-nin M.D.Ö.-yə hətta yumruq da vurduğu üzə çıxıb.

Uşaq bağçası müəllimin işdən qovulduğunu açıqlayıb. Betül K. polis tərəfindən saxlanılıb. O sövq edildiyi ədliyyədə hakim tərəfindən həbs edilib. İfadəsində ittihamları rədd edən müəllim uşağın yatmadığı üçün üzünü yumşaq bir şəkildə sığalladığını bildirib.

Faktla bağlı araşdırmalar davam edir.

Telegramda izləyin