Heyvan mağazasına tutuquşu almağa gedən ailə pişik oğurladı

İzmirin Bornova rayonunda bir ailə heyvan mağazasından tutuquşu alarkən pişik oğurlayıb.

Sonxeber.az türk mediasına istinadən xəbər verir ki, hadisə bir müddət əvvəl Bornova rayonunda yerləşən heyvan mağazasında baş verib. Üç nəfərdən ibarət ailə mağazaya gələrək tutuquşu almaq istədiklərini bildiriblər. 3 min lirəlik tutuquşunu bəyənən ailə 200 lirə depozit qoyaraq dükanı tərk edib.

Bir gün sonra quşu götürməyə gələn ailə üzvləri 3 min lirə ödəyərək tutuquşu alıblar. Satıcı tutuquşunu hazırlayarkən ailə üzvlərindən olan gənc oğlan mağazadakı 2 aylıq pişiyi götürüb və paltosunda gizlədib. Ailə aldıqları tutuquşunu və oğurlanmış pişiyi də götürərək mağazadan çıxıb.

İş yeri sahibi Nurşen Öner (35) bir müddət sonra təhlükəsizlik kameralarını izləyərkən hadisəni anlayıb. O dərhal polisə məlumat verib və ailədən şikayətçi olub.

Nurşen Öner: "Ata mənə zəng etdi. "Oğlum narkotik istifadəçisidir. Mən bunu bilmirdim. Pişiyi qaytaracam. Xahiş edirəm şikayətinizi geri çəkin", - dedi. Bir gün sonra pişiyi gətirdilər. Amma çox güman ki, şikayətimi geri çəkməyəcəm", - deyə bildirib.

Faktla bağlı istintaq davam edir.

Telegramda izləyin