Milyonluq dələduzluqdan bəraət almışdı - 10 illik həbs edildi

Bir milyon manatdan çox dələduzluq ittihamından bəraət alan Azər İsmayılov 5 ay sonra həbs edilib.

Sonxeber.az "Qafqazinfo"a istinadla xəbər verir ki, onun Bakı Ağır Cinayətlər Məhkəməsindən aldığı bəraəti ləğv edilib.

Hökmdən həm prokuror, həm zərərçəkmişlər narazı qalıblar, ləğvi üçün apellyasiya protesti və apellyasiya şikayətləri verilib.

Prokuror protestində göstərib ki, kifayət qədər dəlil və sübutlar, zərərçəkmişlərin şikayətləri olduğu halda çıxarılmış hökm qanunauyğun deyil. Bu cinayət qanunun ədalət prinsipi ilə də üst-üstə düşmür.

İttihamçı hökmün tamamilə ləğv edilməsini, təqsirləndirilən şəxsin sanksiya həddində cəzalandırılmasını tələb edib. Zərərçəkmiş şəxslər də ittiham tərəfinin mövqeyinə uyğun çıxış ediblər.

Ötən gün bu işlə bağlı yekun qərar elan edilib. Sabit Bəhrəmzadənin sədrlik etdiyi hakimlər tərəfləri dinlədikdən, sübutlarla tanış olduqdan sonra hökmün ləğv edilməli olduğu qənaətinə gəliblər.

Qərara əsasən, protest və şikayətlər təmin edilib. Təqsirləndirilən şəxsə verilmiş bəraət ləğv edilib. A.İsmayılov xüsusilə külli miqdarda dələduzluqda təqsirli bilinərək 10 il müddətinə azadlıqdan məhrum olunub. İsmayılov məhkəmə salonunda həbs edilib.

Qeyd edək ki, A.İsmayılov 1 milyon 200 min manatlıq dələduzluqda ittiham olunub. İş üzrə 8 nəfər zərərçəkmiş qismində tanınıb. A.İsmayılov xarici ölkələrdən Azərbaycana ət və ət məhsullarının tədarükü ilə məşğul olub. Zərərçəkənlər də bu alış-veriş zamanı aldanıblar.

Telegramda izləyin