Türkiyədə qadınları yalandan hamilə olduqlarına inandıran "İlin həkimi": Çox sayda körpəni "öldürüb"

Türkiyənin Şırnak vilayətində müayinə üçün gələn qadınlara dərman verərək hamilə olduqlarına inandıran, daha sonra isə uşağın bətndə öldüyünü deyərək abort edən və bundan pul qazanan İsmet Besen adlı həkimin istintaqı davam edir.

Oxu.Az-ın xəbərinə görə, bu barədə "Sabah" nəşri məlumat verib.

Məlumata görə, Şırnakın Silopi rayonunda ginekoloq işləyən 58 yaşlı həkim bir çox qadından müalicə məqsədilə pul alıb və müalicə adı altında saxta prosedurlar həyata keçirib. Xəstələrinə əvvəlcə hamilə olduqlarını, daha sonra körpələrinin ana bətnində öldüyünü deyərək abort edib.

Silopi Asayiş Şöbə Müdirliyinin Fırıldaqçılıq üzrə Bürosunun əməkdaşları tərəfindən 12 zərərçəkmiş qadının ifadələri alınıb. Aparılan DNT testləri zamanı həkimin, həmçinin xəstələrinə verdiyi döllərin də zərərçəkmiş qadınlara aid olmadığı müəyyən edilib.

Bundan əlavə, ekspertiza hesabatında İsmet Besenin istifadə etdiyi dərmanların hamiləlik testinin nəticələrini yanıltdığı, qadınları hamilə olmadıqları halda hamilə kimi göstərdiyi qeyd edilib. Bu dəlil əsasında Şırnak, Aydın və İzmirdə keçirilən əməliyyatlar nəticəsində İsmet Besen və klinikanın 4 işçisi saxlanılıb. İsmet Besen fevralın 14-də "Ağırlaşdırılmış fırıldaqçılıq" maddəsi ilə həbs edilərək cəzaçəkmə müəssisəsinə göndərilib.

Həmçinin istintaq zamanı məlum olub ki, Besen əvvəllər də Silopidə 12 il çalışıb və 1 iyul 2006-cı ildə Şırnakda "İlin həkimi" seçilib, lakin 2007-ci ilin mayında digər iki həkimlə birlikdə narkotik fırıldaqçılığına görə həbs edilib. Bölgədəki 3 sağlamlıq mərkəzi və 9 aptekin də bu məsələdə əli olub və aptek sahibləri nəzarət altına alınıblar.

O dövrdə İsmet Besenin 7 aylıq xəstə protokol dəftəri araşdırılıb və 25 min 600 xəstəni müayinə edərək dərman yazdığı məlum olub. İstintaqın gedişatı zamanı 2005-ci ildə Silopi Dövlət Xəstəxanasına 49 min xəstənin müraciət etdiyi və İsmet Besenin də gündə orta hesabla 171 xəstəni müayinə etdiyi ortaya çıxıb.

Müəyyən edilib ki, hadisədə adları hallanan həkimlər hər gün növbələri bitdikdən sonra kirayə tutduqları mənzildə görüşərək, təxminən 300 Yaşıl Kart və sağlamlıq kartı üçün dərman yazıblar. Həmçinin həkimlərin əməliyyat ediləcək xəstələr və onların yaxınları ilə "bıçaq pulu" bazarlığı etdikləri də aşkar olub. Eyni zamanda, Besenin Ankarada 15 ayrı mənzili və daşınmaz əmlakının olduğu da üzə çıxıb.

Telegramda izləyin