"Bu gün bizim vəzifəmiz dövlətin inkişafı üçün əlimizdən gələni etməkdir" - AÇIQLAMA

"Mütəmadi olaraq Azərbaycanın mediya məkanında dövlətçilik tarixinin, milli adət-ənənələrin, elm və mədəniyyətin təbliği ilə bağlı materiallar dərc olunur. Burada Azərbaycanın mədəniyyətşünaslarından, tarixçilərindən, siyasətçilərdən, politoloqlardan fikirlər öyrənilir və hesab edirəm ki, bu da təbliğat baxımından mühüm əhəmiyyət kəsb edir. Çünki, Azərbaycan tarixən çox çətin geostrateji bölgədə yerləşməsinə baxmayaraq, öz dövləçilik tarixi olub və ümmətdən-millətə, millətdən-dövlətə şüarı ilə qurucu babalarımız bu coğrafiyada dövlət yaradıblar. Bu gün bizim vəzifəmiz də bu dövlətin inkişafı üçün əlimizdən gələni etməkdir".

Bunu Sonxeber.az-a politoloq İlyas Hüseynov danışıb.

O, açıqlamasında qeyd edib ki, 90-ci illərdə ölkədə xaos, anarxiya hökm sürürdü, lakin Ulu öndər Heydər Əliyevin hakimiyyətə gəlişi ilə dövlət və dövlətçilik adına mühüm işlər görüldü:

"90-cı illərdə Azərbaycan öz müstəqilliyini yenidən bərpa edəndə ölkədə xaos, anarxiya hökm sürürdü. Ulu öndər Heydər Əliyevin hakimiyyətə gəlişi ilə dövlət və dövlətçilik adına mühüm işlər görüldü. Ölkənin konstitusiyasının qəbul olunmasından tutmuş, qanunverucilik sisteminin qurulmasına qədər bütün proses Heydər Əliyevin nəzarəti altında icra olunurdu. Eyni zamanda möhkəm təməllər üzərində qurulmuş siyasi, iqtisadi mədəni sistem bu gün öz töhvələrini verir. Azərbaycan Prezidenti Cənab İlham Əliyevin rəhbərliyi altında bizim torpaqlarımız işğaldan azad olundu, suverənliyimiz bərpa olundu və postmüharibə reallıqlarında öz ərazi tamlığını formalaşdıran dövlətin qarşısında mühüm prioritetlər dayanır. Əlbəttə ki, burada milli adət-ənənlərin qorunub saxlanılması, irsimizin müdafiyəsi, eyni zamanda elm adamlarının, mədəniyyət xadimlərinin bu istiqamətdə fəaliyyəti önəmli əhəmiyyət kəsb etməkdədir. Hesab edirəm ki, Azərbaycanın gələcəyi hesab olunan gənclərimiz də məhz milli ruhda böyüməli, tərbiyə almalıdılar. Cənab Prezidentin hər zaman vurğuladığı bir fikir var ki, onun rəhbərliyi altında olan vətənpərvər Azərbaycan gəncləri Qarabağı, Şərqi Zəngəzuru işğaldan azad etdi. Bu çox önəmli tezis olmaqla yanaşı, həm də ona dəlalət edir ki, bu illər ərzində Azərbaycanda torpağına, millətinə bayrağına, dövlətinə sahib çıxan gənclər yetişib və onlar bu gün Azərbaycanın qürurudur".

Vüsalə İbrahimli

Telegramda izləyin