"Növbəti beş il ərzində bərpaolunan mənbələrdən enerji istehsalı potensialımız iki dəfə artıracağıq" - DEPUTAT

"Aprelin 4-də Bakıda Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclasları keçirilib. Prezident İlham Əliyevin çıxış edərək deyib: "Bu gün Günəş və Külək Enerji stansiyalarına aid sərmayədarlarımızla artıq imzalanmış müqavilələr bizə 2030-cu ilə qədər 6 giqavat günəş və külək enerjisi təmin edəcək".

Bunu Sonxeber.az-a Milli Məclisin deputatı Anatoliy Rafailov bildirib.

Deputat qeyd edib ki, nəticədə daxildə bu gün elektrik enerjisinin istehsalında istifadə etdiyimiz təbii qaza xeyli dərəcə qənaət etmək imkanı yaranacaq və həmin qazı ixraca yönəldəcəyik:

"Biz öz sərmayələrimizlə fəal şəkildə inkişaf edirik. Ermənistan işğalından azad edilmiş Şərqi Zəngəzur və Qarabağ ərazilərində su elektrik enerjisi potensialına gəldikdə, biz artıq 270 meqavatlıq su elektrik stansiyalarını qurmuşuq. Artıq 30-dan çox kiçik su elektrik stansiyası istismara verilib və maksimum növbəti beş ildə bu rəqəm əlavə 30 kiçik su elektrik stansiyası ilə 500 meqavata çatdırılacaq. Beləliklə, nəticədə 2030-cu ilə qədər 6.5 giqavatlıq enerji potensialı yaranacaq. Sizi, sadəcə, məlumatlandırmaq üçün deyə bilərəm ki, bu gün Azərbaycanın yaradılmış imkanları 8 giqavatdan çoxdur. Beləliklə, biz növbəti beş il ərzində bərpaolunan mənbələrdən enerji istehsalı potensialımızı demək olar ki, iki dəfə artıracağıq".

Deputat vurğulayıb ki, bu addımlar göstərir ki, Azərbaycanın enerji siyasəti artıq yalnız təbii sərvətlərə deyil, eyni zamanda uzunmüddətli strateji baxışa və yaşıl enerji keçidinə əsaslanır

"Prezidentin çıxışında səsləndirilən 6.5 giqavatlıq hədəf təkcə enerji təhlükəsizliyinin gücləndirilməsi deyil, həm də ixrac imkanlarının genişləndirilməsi baxımından önəmlidir. Azərbaycanın bu istiqamətdə atdığı addımlar onu regionda yaşıl enerji mərkəzinə çevirməyə qadirdir.

Azərbaycanın bu strategiyası həmçinin ölkənin beynəlxalq enerji bazarındakı mövqeyini yenidən müəyyənləşdirir. Ənənəvi qaz ixracatçısı olan Azərbaycan, indi eyni zamanda yaşıl enerji ixracatçısı roluna iddialıdır. Bu dəyişiklik, xüsusilə Avropa İttifaqının enerji mənbələrinin şaxələndirilməsi strategiyasına uyğundur və Cənub Qaz Dəhlizinə yaşıl enerji dəhlizi ilə əlavə dəyər qatır.

Digər tərəfdən, bu təşəbbüslər Azərbaycanın iqlim dəyişikliklərinə qarşı qlobal mübarizəyə verdiyi konkret töhfədir. 2030-cu ilə qədər planlaşdırılan 8 giqavatdan artıq enerji gücü ilə Azərbaycan yalnız daxili tələbatı təmin etməklə kifayətlənməyəcək, həm də enerji ixracını əhəmiyyətli şəkildə artıracaq. Bu isə qeyri-neft sektorunun inkişafını sürətləndirəcək və ölkənin uzunmüddətli dayanıqlı inkişaf məqsədlərinə xidmət edəcək.

Bütün bu tədbirlər Azərbaycanın enerji siyasətini iqtisadi amillərlə yanaşı geosiyasi bir alət kimi istifadə etdiyini nümayiş etdirir. Bu vasitə ilə ölkə həm regionda, həm də qlobal səviyyədə təsir gücünü artırmağa davam edir".

Telegramda izləyin