"Fransanın bütövlükdə mövqeyi Cənubi Qafqaz regionuna xaos gətirməkdən ibarətdir" - AÇIQLAMA

Rəsmi Parisin Ermənistanı öldürücü silahlarla təchiz etməsi, eləcə də sülhə xidmət göstərməyən uzunmüddətli anti-Azərbaycan mövqeyi Fransanın Avropa və xarici işlər naziri Jan Noel Baronun regional gərginliklə bağlı narahatlığı ilə ziddiyyət yaradır.

Bu barədə Azərbaycan Xarici İşlər Nazirliyinin mətbuat katibi Ayxan Hacızadə "X"də yazıb.

Onun sözlərinə görə, bu ikili yanaşma Fransanın riyakarlığını ifşa edir:

"Sülh müqaviləsinin layihəsi üzərində işin yekunlaşması mühüm inkişaf olsa da, sazişin imzalanması və davamlı sabitlik əsas məsələlərin, xüsusilə də Ermənistanın konstitusiyasında ərazi iddialarının həll edilməsini və Fransa da daxil olmaqla destabilləşdirici xarici müdaxilələrin dayandırılmasını tələb edir".

"Fransanın bütövlükdə mövqeyi Cənubi Qafqaz regionuna xaos gətirməkdən ibarətdir" - bunu Sonxeber.az -a açıqlama verən politoloq Tural İsmayılov deyib:

"Fransanın bütövlükdə mövqeyi Cənubi Qafqaz regionuna xaos gətirməkdən ibarətdir. Onların indiyə qədər ortaya qoyduğu dırnaqarası "mövqelər", bölgə ilə bağlı biryanlı və boğazdan yuxarı bəyənnatlar Fransanın real işğalçı mahiyyətini ehtiva etmiş olur. 30 il ərzində beynəlxalq hüququn normalarını pozaraq Azərbaycan torpaqlarını işğal altında saxlayan Ermənistanı Fransa dəstəklədi. Lakin bu illər ərzində Azərbaycanın Ermənistanı sülhə çağırması ilə bağlı Fransa tərəfindən heç bir addım atılmadı. Bu saxtakar Fransa siyasi elitası qəsdən reallıqları görməzdən gələrək regionun taleyi və gələcəyi ilə bağlı qəbuledilməz bəyənnatlar səsləndirir, dırnaqarası fikirlərə sığınmağa çalışır. Bütün bunlar Fransanın ikiüzlülüyünün və siyasi riyakarlığının absurd göstəriciləridir. Azərbaycan Xarici İşlər Nazirliyinin mətbuat katibi Ayxan Hacızadə haqlı olaraq Fransanın pozuculuq əməllərini növbəti dəfə ifşa etmiş oldu. Çünki, sülh müqaviləsindən dəm vuran Ermənistan hələ də öz konsitutsiyasında Azərbaycana qarşı yer alan ərazi iddialarından vaz keçmir. Hələ də ATƏT-in minsk qrupu adlanan şər maşının aradan qaldırılması üçün heç bir addım atmır. Fransa Ermənistana çağırış etmək yerinə əksinə regionda qarşıqlıq yaratmaqla məşğuldur. Onlar Ermənistana ağır hücum silahları verməklə Cənubi Qafqazda müharibə ritorikasını üst sırada saxlamağa çalışır".

Telegramda izləyin