"Həm ikitərəfli formatda, həm də, beynəlxalq təşkilatlar çərçivəsində iki ölkə daim bir- birini dəstəkləyir" - DEPUTAT

"Gürcüstan Prezidenti Mixeil Kavelaşvilinin Azərbaycana səfəri iki ölkə arasında əməkdaşlığın inkişafı baxımından mühüm əhəmiyyət kəsb edir. Bu baxımdan qeyd etmək lazımdır ki, Gürcüstan Prezidentinin ilk xarici səfərini məhz Azərbaycana etməsi iki ölkə arasında yaranmış strateji əlaqələrin yüksək səviyyədə olduğunu deməyə əsas verir. Prezident İlham Əliyev mətbuata bəyanatında bu məqama xüsusi toxunaraq vurğuladı ki, bu, bir daha Gürcüstan-Azərbaycan əlaqələrinin mahiyyətini, xalqlarımızın dostluğunu, qardaşlığını göstərir. Şübhəsiz ki, aprel ayının 16-da baş tutan səfər Gürcüstan və Azərbaycan arasındakı dostluq və qardaşlıq münasibətlərinə yeni təkan verəcək. Əlbəttə, bu münasibətlərin inkişafında Azərbaycan və gürcü xalqları arasında mövcud olan çoxəsrlik dostluq, qardaşlıq və mehriban qonşuluq münasibətlərinin xüsusi yeri və rolu vardır".

Bu fikirləri saytımıza açıqlamasında Milli Məclisin üzvü Tamam Cəfərova deyib.

Deputat açıqlamasında bildirib ki, Azərbayacan və Gürcüstan arasında əməkdaşlıq regional əhəmiyyətə malikdir. Gürcüstan və Azərbaycan Avropa ilə Asiyanı birləşdirən tranzit dəhlizləri kimi mühüm rol oynayır:

"Nəqliyyat infrastrukturunun, o cümlədən dəmir yolu və avtomobil yollarının inkişafı hər iki ölkə üçün prioritet məsələdir. Bir çox icra olunan birgə layihələr təkcə iki ölkə üçün deyil, bölgə üçün, bütövlükdə Avropa üçün xüsusi əhəmiyyət daşıyır. Bu baxımdan, "Yeni İpək Yolu" layihəsi və "Bir kəmər, bir yol" təşəbbüsü bu sahədə əməkdaşlığın dərinləşdirilməsi üçün əlavə imkanlar yaradır. Bu gün Azərbaycan və Gürcüstan arasında strateji tərəfdaşlıq əlaqələri müttəfiqlik səviyyəsinə qalxıb. Bir çox sahələr üzrə fəal əməkdaşlıq əlaqələri mövcuddur. Həm ikitərəfli formatda, həm də, beynəlxalq təşkilatlar çərçivəsində iki ölkə daim bir- birini dəstəkləyir.

Mətbuata bəyanatında cənab Prezident İlham Əliyev Azərbaycan və Gürcüstanın Cənubi Qafqazda sülhün təmin edilməsinə, təhlükəsizliyə öz töhfəsini verdiyini xüsusilə vuğurlayıb. O, deyib: "Cənubi Qafqazda sülhün, əmin-amanlığın bərqərar edilməsi də bizim birgə maraqlarımızda olan məsələdir və burada həm Gürcüstan, həm Azərbaycan öz töhfəsini verir. Əfsuslar olsun ki, uzun illər ərzində Cənubi Qafqaz münaqişə, müharibə arenasına çevrilmişdir. Ümid edirəm ki, bundan sonra Cənubi Qafqazın qara səhifələri bağlanacaq və tarixdə qalacaq. Gürcüstan-Azərbaycan əlaqələri haqqında çox danışmaq olar. Sadəcə, onu bildirmək istəyirəm ki, bundan sonra da bizim əlaqələrimiz yüksələn xətlə inkişaf edəcək". Xüsusilə İkinci Qarabağ Müharibəsi və 2023-cü ilin 19 sentyabr lokal antiterror əməliyyatlarında Azərbaycanın qazandığı mühüm qələbə, ərazi bütövlüyü və suverenliyini tam bərpa etməsi fonunda regionda yaranmış yeni reallıqlar iki ölkə arasında münasibətlərin inkişaf dinamikasına təsir etmişdir".

Millət vəkili, fikirlərinin davamı olaraq qeyd edib ki, Azərbaycanla Gürcüstan arasında enerji sektorunda nümunəvi əməkdaşlıq münasibətləri formalaşıb:

"Hər iki ölkə bu sahədə fəaliyyətlərini daim uzlaşdırırlar. Eyni zamanda, son illərdə Azərbaycanın, Türkiyənin və Gürcüstanın iştirakı ilə səmərəli regional əməkdaşlıq platforması yaranıb. Üç ölkənin birgə fəaliyyəti sayəsində regionun inkişafına güclü təkan verən Bakı-Tbilisi-Supsa, Bakı-Tbilisi-Ceyhan, Bakı-Tbilisi-Ərzurum enerji kəmərləri, həmçinin nəqliyyat sahəsində Bakı-Tbilisi-Qars dəmir yolu xətti istifadəyə verilib. Cənub Qaz Dəhlizinin reallaşdırılmasında da üç ölkənin qarşılıqlı səyləri mühüm rol oynayır. Cənab Prezident İlham Əliyevin dediyi kimi "…
Əgər biz bu gün Avropanın enerji təhlükəsizliyi haqqında danışırıqsa, bunu Azərbaycansız, Gürcüstansız təsəvvür etmək mümkün deyil. Hazırda Gürcüstan daxil olmaqla Azərbaycan 12 ölkəyə təbii qaz ixrac edir və bu ixrac Gürcüstan vasitəsilə həyata keçirilir. Nəqliyyat-kommunikasiya sahəsində əldə olunmuş nailiyyətlər, yeni inşa edilmiş dəmir yolları, limanlar həm Azərbaycanda, həm də Gürcüstanda böyük sinergiya yaratmış və əslində, Orta Dəhlizin ayrılmaz hissəsinə çevrilmişdir. Əgər bu gün biz Cənubi Qafqazda Orta Dəhliz layihəsindən danışırıqsa, bu, Azərbaycandan və Gürcüstandan keçən dəhlizdir. İldən-ilə ölkələrimizin ərazisindən keçən yüklərin həcmi artır və bu yüklərin həcminin artırılması üçün əlavə addımlar atılır. Ümumiyyətlə qeyd etməliyik ki, Gürcüstan prezidenti Mixeil Kavelaşvilinin Azərbaycana səfəri iki ölkə arasında strateji tərəfdaşlığın daha da möhkəmləndirilməsi baxımından olduqca mühüm addım oldu. Bu səfər hər iki ölkənin regionda sülhün, sabitliyin və qarşılıqlı əməkdaşlığın daha da inkişaf etdirilməsində maraqlı olduğunu bir daha təsdiqlədi".

Telegramda izləyin