Kameralara düşən vəhşilik: Qadın gündüz vaxtı küçədə döyüldü - VİDEO

İstanbulun Avcılar rayonunda qadına qarşı baş verən şiddət hadisəsi bir daha cəmiyyətin diqqətini bu problemə yönəltdi. Hadisə Ispartakule Tahtakale məhəlləsində, Ispartakule küçəsində baş verib.

Sonxeber.az türk mediasına istinadən xəbər verir ki, avtomobildən düşən bir qadın, küçənin ortasında iki kişi tərəfindən vəhşicəsinə döyülüb.

Şahidlərin sözlərinə görə, qadının yanında olan və onun dostu olduğu güman edilən başqa bir qadın müdaxilə etməyə çalışsa da, bu cəhd nəticəsiz qalıb. Şiddətə məruz qalan qadın aldığı yumruq və sillələrdən sonra yerə yıxılıb, daha sonra başqa bir kişi onun saçından tutaraq yerdə sürüyüb.

Hadisə ətraf sakinlərinin mobil telefon kamerası ilə qeydə alınıb. Görüntülərdə qadının yardım çağırdığı, lakin yoldan keçənlərin müdaxilə etməkdən çəkinməsi də əks olunur.

Hadisəyə müdaxilə etməyə çalışan bir avtomobil sürücüsü, şiddət tətbiq edən şəxslərdən birinin hədəsi ilə qarşılaşıb və hadisə yerindən uzaqlaşıb.

Daha dəhşətlisi odur ki, qadın bir müddət sonra onu döyən kişi və digər iki nəfərlə birlikdə avtomobilə minib və hadisə yerindən uzaqlaşıb.

Bu hadisə bir daha qadına qarşı zorakılıqla mübarizədə hüquq-mühafizə orqanlarının, cəmiyyətin və medianın üzərinə düşən məsuliyyəti xatırladır. Cəzasızlıq mühiti və ictimai laqeydlik bu kimi halların qarşısını almaqda ciddi maneəyə çevrilir.

Telegramda izləyin