Ətraflı dindirilmə zamanı cinayəti etiraf etdi: Cəsədi çay kənarına atmışdı

Giresunun Doğankent rayonunda 42 yaşlı Yusuf Alimin yoxa çıxması ilə bağlı başlanan axtarışlar sonda qətllə nəticələnən bir cinayəti üzə çıxarıb. Məlum olub ki, Alim əvvəllər oğurluq cinayətindən məhkum olunmuş A.Nuri tərəfindən qətlə yetirilib.

Sonxeber.az türk mediasına istinadən xəbər verir ki, hadisə Yusuf Alimin gecə saat 01:00 radələrində evindən çıxaraq bir daha geri dönməməsi ilə başlayıb. Ailəsinin müraciətindən sonra Doğankent Rayon Polis Şöbəsinin koordinasiyası ilə istintaq-əməliyyat tədbirləri çərçivəsində müxtəlif sahələr üzrə ixtisaslaşmış polis qrupları — İstintaq, Cinayət Axtarışı, Narkotiklərlə Mübarizə və Kəşfiyyat bölmələri tərəfindən genişmiqyaslı axtarışa başlanılıb.

Araşdırmalar zamanı Plaka Tanıma Sistemi (PTS) qeydləri və telefon danışıqları təhlil edilib. Əldə olunan məlumatlara əsasən, Alimin modeli müəyyən edilməmiş bir avtomobilə minərək Tirebolu istiqamətinə doğru hərəkət etdiyi məlum olub. İstintaq nəticəsində 46 yaşlı A.Nuriyə məxsus, dövlət qeydiyyat nişanı 28-TA-023 olan avtomobil diqqət mərkəzinə düşüb. Həmin gecə A.Nurinin Yusuf Alimlə telefon əlaqəsi saxladığı da müəyyən edilib.

A.Nuri saxlanılaraq istintaqa cəlb edilib və dindirilmə zamanı cinayəti etiraf edib. Bildirib ki, Alimi odlu silahla qətlə yetirib və cinayətdə istifadə olunan silahı Harşit çayına atıb. Polis idarəsindəki ilkin ifadəsindən sonra məhkəməyə çıxarılan A.Nuri barəsində həbs qətimkan tədbiri seçilərək Espiye L Tipli Cəzaçəkmə Müəssisəsinə göndərilib.

Qeyd edək ki, silahla vurularaq öldürülən Yusuf Alimin daha əvvəl sələmçilik, A.Nurinin isə oğurluq cinayətləri ilə bağlı hüquq-mühafizə orqanlarında qeydiyyatlarının olduğu məlum olub.

Telegramda izləyin