Konyada təbii qaz partlayışı: 1-i ağır olmaqla 12 nəfər yaralandı

Türkiyənin Konya şəhərində 4 mərtəbəli binanın 3-cü mərtəbəsində təbii qaz sızmasından qaynaqlandığı ehtimal edilən partlayış və ardınca baş verən yanğın nəticəsində 12 nəfər xəsarət alıb. Yaralılardan birinin vəziyyəti ağırdır.

Sonxeber.az türk mediasına istinadən xəbər verir ki, hadisə 5 may 2025-ci il tarixində, gecə saat 01:40 radələrində Karatay rayonunun Gaziosmanpaşa məhəlləsindəki Menzil küçəsində yerləşən binada baş verib. Güclü partlayışdan sonra binada yanğın çıxıb.

Əraziyə dərhal təcili yardım, yanğınsöndürmə, polis, AFAD və qaz şirkəti Gaznetin əməkdaşları cəlb olunub. Yanğın yanğınsöndürənlərin müdaxiləsi ilə nəzarət altına alınıb və söndürülüb. Yaralılar təcili tibbi yardım maşınları ilə xəstəxanalara yerləşdirilib.

Konya Valiliyi hadisə ilə bağlı rəsmi açıqlama yayaraq bildirib ki, hadisə yerində axtarış-xilasetmə və təhlükəsizlik tədbirləri davam etdirilir. Valilik yaralılara şəfa diləyib.

Hadisə ilə bağlı araşdırma başladılıb.

Telegramda izləyin