Telefonla danışarkən dirəyə söykəndi – küçə lampası qadının üstünə aşdı

Polşanın cənubunda yerləşən Novy Targ qəsəbəsində adi bir gün gözlənilməz hadisə ilə nəticələnib. Günorta saatlarında baş verən insidentdə bir kişi telefonla danışarkən söykəndiyi küçə lampasının aşmasına səbəb olub.

Sonxeber.az türk mediasına istinadən xəbər verir ki, aşan dirək həmin anda yoldan keçən qadının üstünə düşüb.

Hadisə şahidlərinin bildirdiyinə görə, təxminən 40 yaşlarında olan kişi qəsəbə meydanında yerləşən işıq dirəyinə söykənərək telefonla danışırmış. Qısa bir müddət sonra, ehtimal ki, illərin təsirindən zəifləyən və ya dirəyin yerləşdiyi səthdəki çatlar səbəbilə sabitliyini itirən işıq dirəyi kişinin ağırlığı ilə birdən-birə yerə aşıb.

Bu zaman yoldan keçməkdə olan 35 yaşlı Maria K. dirəyin birbaşa üstünə düşməsi təhlükəsi ilə üzləşib. Onun çevik reaksiyası sayəsində qadın son anda kənara çəkilə bilib.

Lakin hadisə nəticəsində onun çiyin və ayaq nahiyəsində yüngül sıyrıqlar əmələ gəlib.

Hadisə yerinə cəlb olunan təcili tibbi yardım briqadası yaralı qadına ilkin tibbi müdaxiləni göstərib. Maria K.-nın vəziyyətinin ciddi olmadığı, lakin ehtiyat məqsədilə xəstəxanaya aparıldığı bildirilib.

Novy Targ bələdiyyə başçısı Tomasz Novak məsələ ilə bağlı verdiyi açıqlamada, "Bu üzücü hadisə şəhərimizin küçə infrastrukturuna nəzarət məsələsində daha diqqətli olmalı olduğumuzu göstərdi. Oxşar vəziyyətdə olan bütün işıq dirəkləri təcili şəkildə yoxlanacaq və lazımi təmir işləri aparılacaq," – deyə bildirib.

Hadisəyə səbəb olan kişi isə şok vəziyyətində olduğunu bildirib: "Sadəcə telefonla danışmaq üçün dirəyə söykənmişdim. Birdən-birə dirəyin titrədiyini və sonra aşdığını hiss etdim," – deyə o qeyd edib.

Telegramda izləyin