Elektrik vurması nəticəsində xəsarət alan 22 yaşlı gənc həyatını itirdi

Türkiyənin Denizli şəhərində evdən əşyaların çıxarılması üçün quraşdırılan yük liftinin elektrik naqillərinə toxunması nəticəsində 22 yaşlı Batuhan Koçan elektrik vurması səbəbilə ağır xəsarət alıb və daha sonra həyatını itirib.

Sonxeber.az türk mediasına istinadən xəbər verir ki, hadisə Pamukkale rayonunun Bağbaşı məhəlləsində baş verib. Əldə edilən məlumata görə, köç prosesi həyata keçirilən mənzilin əşyalarının daşınması üçün binanın kənarına yük lift sistemi quraşdırılıb. Əşyaların daşınması zamanı liftin metal hissəsi yoldan keçən elektrik naqillərinə toxunub.

Bu zaman yaxınlıqda olan Batuhan Koçan elektrik vurması nəticəsində ağır xəsarət alıb. Hadisə yerinə çağırılan Təcili Tibbi Yardım briqadası tərəfindən dərhal xəstəxanaya aparılsa da, həkimlərin səylərinə baxmayaraq onun həyatını xilas etmək mümkün olmayıb.

Batuhan Koçanın cansız bədəni müayinə üçün Adli Tibb Qurumu Denizli Qrup Sədrliyinin morquna təhvil verilib. Hadisə ilə bağlı araşdırmalara başlanılıb.

Telegramda izləyin