Orta məktəb şagirdi 12 yaşlı dostunu tüfənglə ayağından vurdu

Türkiyənin Aksaray şəhərində 15 yaşlı orta məktəb şagirdi Y.Ç., evinə apardığı 12 yaşlı sinif yoldaşı Dərman Ali Yerliyi tüfənglə ayağından vurub. Hadisə axşam saatlarında, Yeni Sənaye məhəlləsində baş verib.

Sonxeber.az türk mediasına istinadən xəbər verir ki, iddialara görə, 7-ci sinif şagirdi Y.Ç. məktəb çıxışı dostu Dərman Ali Yerliyi göyərçinlərini göstərmək üçün evinə aparıb. Lakin Dərman Ali evə getmək istədiyini bildirəndə, Y.Ç. ona havalı tüfənglə atəş açıb və onu ayağından yaralayıb.

Hadisəni görənlərin məlumatı əsasında əraziyə təcili tibbi yardım çağırılıb. Yaralanan uşaq Aksaray Təhsil və Araşdırma Xəstəxanasına yerləşdirilib. Məlumatı alan Dərman Alinin anası Filiz Yerli jurnalistlərə açıqlamasında bildirib: "Oğluma məktəb çıxışında dostu "göyərçin göstərəcəyəm" deyərək zorla evə aparıb. Oğlum evə qayıtmaq istədiyini deyəndə isə ona havalı tüfənglə atəş açıb. Atəş açan uşaq 15 yaşındadır, hadisəni öz evinin həyətində törədib", - deyə o, qeyd edib

Polis əməkdaşları Y.Ç.-ni havalı tüfənglə birlikdə saxlayaraq Uşaq Şöbəsinə aparıblar. Hadisə ilə bağlı araşdırma davam etdirilir.

Telegramda izləyin