Ağcaqanad dişləməsi nəticəsində 8 yaşlı uşağın həyatı alt-üst oldu

Eskişehirdə yaşayan 8 yaşlı Mehmet Emir Özbakanın həyatı, cəmi 1 yaş yarımlıq olarkən ağcaqanad dişləməsi nəticəsində tamamilə dəyişdi.

Sonxeber.az türk mediasına istinadən xəbər verir ki, ailəsi ilə birlikdə dəfn mərasimi üçün Afyonkarahisarın Emirdağ rayonuna gedən azyaşlı uşaq orada yatarkən ağcaqanad tərəfindən dişlənib.

Həkimlər onun Qərbi Nil virusu daşıyan ağcaqanad vasitəsilə virusa yoluxduğunu və bu virusun beynə yayılaraq ciddi fəsadlar yaratdığını bildiriblər.

Dişləmədən əvvəl tamamilə sağlam olan və yeriyib danışa bilən Mehmet Emir, həmin hadisədən sonra hərəkətsiz vəziyyətə düşüb və uzun müddət burundan hortum vasitəsilə qidalanmalı olub.

Hazırda davamlı fiziki terapiya sayəsində müəyyən irəliləyiş əldə edilib – o, artıq hortumla qidalanmır və hərəkətlənməyə başlayıb. Ancaq hələ də başını saxlamaq və sərbəst oturmaqda çətinlik çəkir.

Telegramda izləyin