30 metrlik qayalıqdan yıxılan şəxs həyatını itirdi - FOTO

Türkiyənin Antalya şəhərində yerləşən falezlərdə (sahil qayalıqları) faciəvi hadisə baş verib. Təxminən 30 metr hündürlükdən qayalıq sahəyə düşən bir kişi həyatını itirib.

Sonxeber.az türk mediasına istinadən xəbər verir ki, hadisə axşam saat 22:30 radələrində Antalya şəhərinin Müratpaşa rayonunun Kılınçarslan məhəlləsində yerləşən Karaalioğlu Parkında qeydə alınıb. Əldə edilən məlumata görə, parkda olan bir şəxs hələlik məlum olmayan səbəbdən təxminən 30 metr yüksəklikdən qayalıq əraziyə yıxılıb.

Hadisənin şahidi olan vətəndaşlar dərhal 112 Təcili Yardım Xidmətinə məlumat veriblər. Hadisə yerinə polis, xilasetmə və təcili tibbi yardım qrupları cəlb olunub.

Təcili tibbi yardım əməkdaşlarının keçirdiyi ilkin müayinə nəticəsində şəxsin hadisə yerində həyatını itirdiyi bildirilib. Daha sonra əraziyə dəniz polisi və Sahil Mühafizə xidmətinin əməkdaşları da yönləndirilib.

Təxminən bir saat davam edən xilasetmə əməliyyatının ardından mərhumun cəsədi dəniz yolu ilə Kaleiçi Yat Limanına — Daxili İşlər Nazirliyinin Dəniz Limanı Polis Şöbəsi və Sahil Mühafizə Qrup Komandanlığının mövqeyinə gətirilib.

Burada aparılan araşdırmalar zamanı dünyasını dəyişən şəxsin 46 yaşlı Burhan Kanyılmaz olduğu müəyyən edilib. Hadisə yerində aparılan hüquqi ekspertiza işlərindən sonra mərhumun cəsədi tibbi ekspertiza üçün Antalya Ədli Tibb İdarəsinin morquna təhvil verilib.

Telegramda izləyin