Məsciddə yumruq-təpik davası: "Telefonu söndür" dedi, döyüldü - VİDEO

Sarıyerin Maslak qəsəbəsində yerləşən məsciddə Cümə namazından sonra baş verən insident təhlükəsizlik kameralarına düşüb.

Sonxeber.az türk mediasına istinadən xəbər verir ki, 54 yaşlı Ekrem K. namazdan sonra məsciddə mobil telefonla danışarkən, 40 yaşlı Ahmet T. tərəfindən "Telefonu söndür" xəbərdarlığı ilə qarşılaşıb. Aralarında düşən mübahisə qısa müddətdə fiziki qarşıdurmaya çevrilib və Ahmet T., Ekrem K.-yə yumruq və təpiklə hücum edərək onu döyüb.

Hadisə aprelin 11-də, cümə günü saat 14:00 radələrində qeydə alınıb. Məlumata görə, Ekrem K. Cümə namazını qıldıqdan sonra məsciddə mobil telefonla danışmağa başlayıb. Bu zaman hələ də namaz qılan şəxslərdən biri olan Ahmet T. ona "Telefonu söndür" deyərək xəbərdarlıq edib. Ekrem K.-nin "Namaz bitib, içəridə heç kim qalmayıb" cavabından sonra isə Ahmet T. onun üstünə gedərək fiziki hücuma keçib.

Ətrafdakı insanlar hadisəyə müdaxilə edərək tərəfləri ayırmağa çalışıblar. Hücuma məruz qalan Ekrem K. hadisədən sonra polisə müraciət edib və təhlükəsizlik kamerası görüntüləri ilə birlikdə şikayətçi olub.

Polis araşdırması zamanı Ahmet T.-nin daha öncə 7 dəfə cinayətə qarışdığı məlum olub. Sərt təhlükəsizlik tədbirləri ilə gözaltına alınan Ahmet T. ifadəsi alındıqdan sonra, məhkəmə qərarı ilə "Qəsdən bədən xəsarəti yetirmə" maddəsi üzrə adli iş açılaraq sərbəst buraxılıb.

Hadisə, dini məkanlarda nizam-intizam və insanların qarşılıqlı hörmət prinsiplərinin vacibliyini bir daha gündəmə gətirib.

Telegramda izləyin