Evsiz şəxs sahildə ölü tapıldı

Antalyanın Konyaaltı sahilində evsiz bir şəxs ölü vəziyyətdə tapılıb.

Sonxeber.az türk mediasına istinadən xəbər verir ki, hadisə, saat 12:00 radələrində Konyaaltı rayonunun Arapsuyu məhəlləsində, Akdeniz bulvarındakı sahil zolağında baş verib.

Əldə olunan məlumata görə, ərazidəki sahibkarlar 45 yaşlı İsa Lafcının qumsalda ədyala bürünmüş vəziyyətdə hərəkətsiz olduğunu görüblər. Bundan sonra əraziyə gələn bələdiyyə işçiləri onu oyandırmağa çalışıblar. Ancaq onun hərəkət etmədiyini görənlər dərhal 112 Təcili Yardım Xidmətinə məlumat veriblər.

Hadisə yerinə gələn təcili tibbi yardım işçiləri İsa Lafcının artıq həyatını itirdiyini müəyyən ediblər. Ardınca Konyaaltı Rayon Polis İdarəsi, Hadisə Yeri Araşdırma və Asayiş Şöbəsinin Cinayət Büro əməkdaşları hadisə yerinə cəlb olunublar.

Prokurorluq və araşdırma qruplarının yerindəki işlərindən sonra meyit ölüm səbəbinin müəyyənləşdirilməsi üçün Antalya Ədli Tibb Qurumu morquna aparılıb.

Əraziyə yığışan insanların isə sahildəki cansız bədənə məhəl qoymadan dənizdə çimməyə davam etmələri diqqət çəkib.

Telegramda izləyin