17 yaşlı tiktok fenomeni evində qətlə yetirildi

Pakistanda 1 milyondan çox izləyicisi olan 17 yaşlı TikTok fenomeni Sana Yousaf, ona dəfələrlə yaxınlaşmağa çalışan şəxs tərəfindən evində qətlə yetirilib. Polis, 22 yaşlı şübhəlini saxlayıb.

Sonxeber.az xəbər verir ki, hadisə, Sana Yousaf-ın 17-ci doğum gününü qeyd etməsindən cəmi bir neçə gün sonra, bazar ertəsi axşamı baş verib. İslamabaddakı evində öldürülən gənc influencer sonuncu paylaşımında doğum gününü qeyd edirdi.

TikTok-da 800 min, bütün sosial şəbəkələrdə isə 1 milyondan çox izləyicisi olan Yousaf, makiyaj məsləhətləri, rəqs videoları və gözəllik məhsullarının təqdimatını edirdi. Polis rəsmilərinin məlumatına görə, 22 yaşlı şübhəli Yousaf-ın təkliflərini rədd etməsini həzm edə bilməyərək onu evində güllələyib.

İslamabad Polis Müdiri Syed Ali Nasir Rizvi hadisəni "dəfələrlə rədd edilmənin nəticəsi" kimi qiymətləndirib: "Gənc adam ona təkrar-təkrar yaxınlaşmağa çalışırdı. Bu, dəhşətli və soyuqqanlı qətl idi," – deyə Rizvi bildirib.

Şübhəlinin saatlarla qızın evinin qarşısında gəzdiyi və daha sonra içəri girərək Yousaf-ı öldürdüyü qeyd olunur. Sana Yousaf-ın ölüm xəbərindən sonra son videosunun altına minlərlə "Huzur içində yat" və "Sana üçün ədalət" şərhləri yazılıb. İzləyiciləri gənc influencer-in faciəvi ölümünə dərin üzüntü ifadə ediblər.

Pakistan İnsan Haqları Komissiyasının məlumatına görə, ölkədə qadınlara qarşı şiddət geniş yayılıb və evlilik təklifini rədd edən qadınlara hücumlar tez-tez baş verir.

Telegramda izləyin