İş adamı silahlı hücuma məruz qaldı - VİDEO

İzmirin Çeşmə rayonunda iş adamı Fatih Fil silahlı hücuma məruz qalıb. Hadisə anı təhlükəsizlik kamerası tərəfindən qeydə alınıb.

Sonxeber.az türk mediasına istinadən xəbər verir ki, yaralı vəziyyətdə xəstəxanaya aparılan Filin vəziyyətinin yaxşı olduğu bildirilir.

Hadisə saat 20:15 radələrində Alaçatı Hacı Memiş məhəlləsində baş verib. Filoğlu Qrup İdarə Heyətinin sədri və Fenerbahçe Konqres Üzvü olan iş adamı Fatih Fil, bir nəfərlə küçədə gəzərkən, hələlik kimliyi müəyyənləşdirilməyən şəxs tərəfindən silahlı hücuma məruz qalıb.

Hücum edən şəxs tapança ilə atəş açıb və Fatih Filin ayağına iki güllə dəyib. Yerdə qalan Fil ağır yaralanıb. Silahlı şəxs hadisə yerindən qaçıb. Ətrafdakıların məlumatı əsasında hadisə yerinə polis və təcili tibbi yardım briqadaları gəlib.

Fatih Fil təcili yardım maşını ilə Çeşmə Dövlət Xəstəxanasına aparılıb. Burada müalicə altına alınan Fatih Filin vəziyyətinin yaxşı olduğu bildirilib. Polis qüvvələri silahlı hücumu törədən şəxsi tapmaq üçün əməliyyatlara başlayıb.

Digər tərəfdən, Fatih Filə edilən silahlı hücum ərazidəki təhlükəsizlik kamerası tərəfindən qeydə alınıb. Görüntülərdə Filin arxasından gələn bir şəxsin tapança ilə atəş açması, Fatih Filin ayağından yaralanaraq yerə yıxılması və ətrafdakıların qorxu içində qaçması əks olunub. Hadisə ilə bağlı istintaq davam etdirilir.

Telegramda izləyin