Dilan Polatın mühafizəçisinə xəstəxana qarşısında silahlı hücum

İstanbulun Ümraniye rayonunda, Dilan Polatın müalicə aldığı xəstəxananın qarşısında onun şəxsi mühafizəçisi Alper Ş. silahlı hücuma məruz qalıb.

Sonxeber.az türk mediasına istinadən xəbər verir ki, bədəninə 3 güllə dəyən mühafizəçi dərhal xəstəxanaya yerləşdirilib. Onun vəziyyətinin yaxşı olduğu bildirilir.

Hadisə Yamanevler məhəlləsindəki Tevfik İleri Caddesi üzərində yerləşən özəl xəstəxananın qarşısında baş verib. Gün ərzində həmin ərazidə gözlədiyi iddia edilən silahlı şəxs, Dilan Polatın mühafizəçisi Alper Ş.-ni izləməyə başlayıb. Şübhəlinin Alper Ş.-ni bir müddət telefonla məşğul etdiyi, mühafizəçinin avtomobilə minmək istədiyi an isə 7 dəfə atəş açaraq hadisə yerindən qaçdığı bildirilir.

Güllələrdən 3-ü Alper Ş.-nin bədəninə dəyib. Yaralı mühafizəçi Ümraniye Tədris və Araşdırma Xəstəxanasında müalicəyə alınıb. Hadisə yerində araşdırma aparan polis qrupları hücum edən şəxsin tapılması üçün əməliyyatlara başlayıb. Hücumla bağlı araşdırma davam edir.

Dilan Polatın həyat yoldaşı Engin Polat da xəstəxanaya gələrək yaralı mühafizəçinin vəziyyəti ilə bağlı həkimlərdən məlumat alıb.

Telegramda izləyin