Ata iki övladını yataqlarında boğaraq öldürdü

Kocaelinin Körfəz bölgəsində baş verən və ictimaiyyətdə böyük rezonansa səbəb olan dəhşətli ailə faciəsinin təfərrüatları ortaya çıxmağa davam edir.

Sonxeber.az türk mediasına istinadən xəbər verir ki, gecə saatlarında şübhəli şəkildə küçədə gəzən 45 yaşlı Murat R.-ni görən polis əməkdaşları onu saxlayaraq ifadə almaq üçün bölməyə aparıblar. Şübhəli şəxsin qeyri-adi və çaşqın davranışları, "Uşaqlarımı cənnətə göndərdim, özüm də bura gəldim" kimi sözləri polis əməkdaşlarının diqqətini çəkib.

Daha sonra Murat R.-nin Esentepe məhəlləsində yerləşən anasının evinə baxış keçirilib. Evdə onun iki övladı – 13 yaşlı Beril Yağmur və 10 yaşlı Yunus Emre R.-nin cansız bədənləri aşkar olunub. Meyitlər morqa təhvil verilib, aparılan tibbi ekspertiza nəticəsində hər iki uşağın boğularaq öldürüldüyü müəyyən edilib.

Hadisədən dərhal sonra saxlanılan Murat R., 5 ay müddətində ruhi-əsəb xəstəxanasında müalicə aldıqdan sonra həbsxanaya köçürülüb. Məhkəmədə verdiyi ifadədə o, hadisəni xatırlamadığını, həyat yoldaşı ilə münasibətlərinin gərgin olduğunu və psixoloji durumunun pozulduğunu bildirib. Onun hadisədən sonra yazdığı məktubda isə uşaqlarına dərin sevgi dolu və dramatik sözlər yer alıb:

"Mələk övladlarım mənim… Bu dünyada sizdən başqa heç kimim yoxdur. Mən həm atasız, həm anasız böyümüşəm. Sizi heç kimə möhtac etmərəm. Sizi bu dünyanın insanlarına əmanət edə bilmərəm. Artıq siz mənim içimdə mələk kimi yaşayacaqsınız…"

Kocaeli 4-cü Ağır Cəza Məhkəməsində keçirilən prosesdə, SEGBİS bağlantısı təmin olunmadığı üçün təqsirləndirilən şəxs dinlənilə bilməyib. Onun vəkili daha əvvəl təqdim olunan "tam cəza məsuliyyətinə malikdir" rəyinə etiraz edib və yenidən ekspertiza tələb olunub. Adli Tibb Qurumu 4-cü İxtisas Komissiyasının verdiyi ikinci rəyə əsasən də Murat R.-nin cəza məsuliyyətini dərk etmə qabiliyyəti tam olduğu bildirilib. Məhkəmə, vəkillərin əlavə vaxt tələbi səbəbilə növbəti iclasa qədər təxirə salınıb.

Telegramda izləyin