4 aylıq körpəsini pəncərədən atmaq istədi – Anbaan dəhşət yaşandı

Türkiyənin Çorlu rayonunda ailə münaqişəsi faciəyə çevrilmək üzrə idi.

Sonxeber.az türk mediasına istinadən xəbər verir ki, Fabrikdə çalışan Tolqahan T., həyat yoldaşı Şirin T. ilə aralarında yaranan mübahisədən sonra, 4 aylıq körpəsini evdə tək qoyaraq anasının evinə gedən qadına əsəbiləşib. O, azyaşlı körpəni qucağına alaraq 3-cü mərtəbədəki mənzilin pəncərəsindən yerə atmaqla hədələyib.

Hadisə yerinə çağırılan polis və təcili yardım qrupları, ətrafda toplaşan narahat sakinlərin baxışları altında uzun müddət Tolqahan T. ilə danışmağa çalışsalar da, nəticə ala bilməyiblər. Təxminən bir saatdan sonra polis müdaxilə etməyə qərar verib.

Bu zaman xilasedicilər evin qarşısına qoruyucu döşək açıblar. Mənzilə daxil olmağa çalışan polis, kişinin qapının arxasına divan və kreslolarla maneə yaratdığını görüb. Digər polis əməkdaşları binanın bayırından pəncərəyə yaxınlaşaraq onu fikrindən daşındırmağa çalışıb. Nəhayət, həm pəncərədən, həm də qapıdan evə daxil olan hüquq-mühafizə orqanları Tolqahan T.-ni zərərsizləşdirib və körpəni xilas ediblər.

Sağlamlıq vəziyyəti yaxşı olan körpə anasına təhvil verilib. Göz yaşlarına hakim ola bilməyən ana övladına qovuşub. Ata isə saxlanılaraq polis bölməsinə aparılıb.

Telegramda izləyin