Təmizlik etdiyi villada hovuza yıxılan qadın həyatını itirdi

Denizlinin Merkezefendi rayonunda Göveçlik məhəlləsində baş verən hadisə faciə ilə nəticələnib.

Sonxeber.az türk mediasına istinadən xəbər verir ki, əldə edilən məlumata görə, ailə büdcəsinə dəstək olmaq məqsədilə evlərdə təmizlik işi görən 44 yaşlı Havane Oy, təmizlik etdiyi villada hovuz kənarında işləyərkən tarazlığını itirib və hovuza yıxılıb. Üzməyi bacarmayan qadın bir müddət sonra fərq edilərək sudan çıxarılıb.

Hadisə barədə məlumat verildikdən sonra əraziyə polis və təcili tibbi yardım briqadası cəlb olunub.Tibb işçiləri ağır vəziyyətdə olan Havane Oy-a hadisə yerində ilkin tibbi yardım göstərdikdən sonra onu təcili olaraq Server Gazi Dövlət Xəstəxanasına aparıblar.

Həyati təhlükəsi davam edən qadın daha sonra Pamukkale Universiteti Tibb Fakültəsi Xəstəxanasına köçürülüb. Lakin həkimlərin bütün səylərinə baxmayaraq, Havane Oy bu gün səhər saatlarında həyatını itirib. Onun cənazəsi xəstəxananın morqundan alınaraq tibbi ekspertiza üçün Məhkəmə-Tibb Qrup Başkanlığına təhvil verilib. Bir uşaq anası olan Oyun cənazəsinin bu gün Tavas rayonunun Karahisar məhəlləsində torpağa tapşırılacağı bildirilib.

Telegramda izləyin