Dənizdə dəhşət anları: 16 yaşlı gənci yumruqlarla köpək balığından xilas etdilər

Avstraliyanın Yeni Cənubi Uels ştatında yerləşən Cabarita çimərliyində 16 yaşlı bir gənc köpək balığı hücumuna məruz qalıb. Hadisə anı və sonrasında yaşananlar mobil telefon kamerası ilə qeydə alınıb.

Sonxeber.az türk mediasına istinadən xəbər verir ki, baş verən insident zamanı dənizdə olan gəncə köpək balığı hücum edib. Onun sağ qolu, biləyi və ayağı ciddi şəkildə yaralanıb. Sahildə olan insanlar dərhal köməyə tələssələr də, köpək balığı hələ də suda dolaşırdı.

Məhz o anda cəsur bir şəxs gənci xilas etmək üçün suya girərək köpək balığına yumruq atıb. Digər çimərlik ziyarətçiləri panika içində sahildən uzaqlaşsa da, qəhrəmanlıq görüntüləri sosial mediada geniş rezonans doğurub. Gəncin sahilə çıxarılması üçün sörf taxtası xərə kimi istifadə olunub. Daha sonra yaralı avtomobil dayanacağına aparılıb və orada təsadüfən olan iki qeyri-növbətçi (off-duty) tibb işçisi turniket tətbiq edərək qanaxmanı dayandırıb.

Gənc qısa müddət ərzində helikopterlə Gold Coast Universitet Xəstəxanasına çatdırılıb. Vəziyyətinin ciddi, lakin stabil olduğu bildirilib.

Hadisədən sonra açıqlama verən tibb işçisi Ben Mumford bildirib: "Orada olan bir neçə cəsur insan həqiqətən böyük iş gördü. İki tibb işçisi ilkin tibbi yardım göstərdi və bizim gəlməyimizə qədər vaxt qazandırdılar".

Köpək balığının tapılması üçün hava axtarış əməliyyatı başladılıb, lakin hələ nəticə əldə olunmayıb. Hücumu həyata keçirən növ dəqiqləşdirilməyib. Lakin rəsmi şəxslər bildiriblər ki, üç gün əvvəl həmin çimərlikdə bir pələng köpək balığına izləmə cihazı taxılıb.

Çimərlik rəhbərliyi ikinci xəbərdarlığa qədər Cabarita çimərliyinin ictimaiyyət üçün bağlı qalacağını elan edib.

Telegramda izləyin