Məzuniyyət mərasimində diplomunu cıran tələbə polis tərəfindən saxlanıldı

Boğaziçi Universitetinin məzuniyyət mərasimində tələbə Doruk Dörücü, İstanbul Böyükşəhər Bələdiyyə Başçısı və Cümhuriyyət Xalq Partiyasının (CHP) prezidentliyə namizədi Ekrem İmamoğlunun diplomunun ləğv edilməsini etirazla qarşılayıb.

Sonxeber.az türk mediasına istinadən xəbər verir ki, o, səhnəyə çıxaraq diplomunu cırıb.

Doruk Dörücünün bu addımı valideynlər arasında da birmənalı qarşılanmayıb. Bəzi valideynlər, "Məzuniyyətə gəldik, siyasət dinləməyə yox," deyə etiraz etsə də, digərləri onu alqışlarla dəstəkləyib.

Hadisənin görüntüləri sosial mediada yayıldıqdan sonra Dörücü polis tərəfindən saxlanılıb.

Bu barədə CHP Üsküdar Bələdiyyə Məclisi qrup sədr müavini Güneş Gülaydın sosial media hesabında paylaşım edərək bunları qeyd edib:

"Gənclik qolları üzvümüz Doruk Dörücü gecə yarısı saxlanılıb. Ölkədə saysız-hesabsız qanunsuzluq baş verir, ancaq bunlara qarşı tədbir görülmür, əvəzində bu qanunsuzluqlara səs çıxaran parlaq gənclər tələm-tələsik saxlanılır. Bunu qətiyyən qəbul etmirik! Tək bir yol yoldaşımızı belə bu basqıçı düşüncənin əlinə buraxmayacağıq! Qurtuluş təkbaşına yoxdur - ya hamımız, ya heç birimiz!".

Telegramda izləyin