Qəza sonrası köməyə gələn polisə daş, çubuq və bıçaqla hücum etdilər

Türkiyənin Qaziantep vilayətində, 18 yaşlı A.Ö.A.-nın idarə etdiyi Fransa nömrə nişanlı mikroavtobus bu səhər saatlarında Nurdağı rayonunun Gözlühöyük kəndi yaxınlığında naməlum səbəbdən idarəetmədən çıxaraq aşıb.

Sonxeber.az xəbər verir ki, qəza nəticəsində mikroavtobusun sürücüsü yaralanıb və hadisə yerinə dərhal polis əməkdaşları göndərilib. Yaralı sürücü xəstəxanaya aparılaraq müalicəyə alınıb.

Polis əməkdaşları mikroavtobusu yoldan qaldırıb yolu nəqliyyat üçün açmağa çalışıblar.

Lakin məlum olub ki, mikroavtobusda olan bir qrup şəxs bu müdaxiləyə mane olmağa çalışıb. Bu zaman həmin qrup daş, çubuq və bıçaqlarla polis əməkdaşlarına hücum edib.

Baş verən qarşıdurma nəticəsində 4 polis əməkdaşı yüngül xəsarət alıb. Əraziyə göndərilən əlavə qüvvələrin müdaxiləsi ilə 5 nəfər zərərsizləşdirilərək saxlanılıb. Onların suriyalı qeyri-qanuni miqrantlar olduğu müəyyən edilib.

Hadisə ilə bağlı araşdırma davam edir.

Telegramda izləyin