İtkin düşən qadın 3 gün sonra sağ tapıldı

Türkiyənin Batman vilayətinin Kozluk rayonunda üç gün əvvəl itkin düşən 63 yaşlı Fatma Uçma sağ-salamat tapılıb.

Sonxeber.az türk mediasına istinadən xəbər verir ki, Batman Valiliyinin yaydığı açıqlamada bildirilir ki, axtarış-xilasetmə işlərinə Batman AFAD, Erzurum AFAD, ANDA Axtarış-Xilasetmə qrupu, Batman Axtarış-Xilasetmə, AFAD könüllüləri, təhlükəsizlik könüllüləri, Jandarma Xüsusi Əməliyyat Qrupu, Məhkəmə-Tədqiqat Qrupu, Kozluk Rayon Jandarma Komandanlığının əməkdaşları olmaqla ümumilikdə 128 nəfər şəxsi heyət, 13 texnika, 1 dron və 1 axtarış-xilasetmə iti cəlb olunub.

Axtarış tədbirlərinin üçüncü günü – saat 15:55 radələrində Fatma Uçma Tosunpınar kəndindəki evindən təxminən 2 kilometr uzaqda yerləşən Ayngebire piknik sahəsində sağ şəkildə tapılıb.

Valiliyin məlumatına görə, Fatma Uçma bu müddət ərzində piknik sahəsində qalan ziyarətçilərin qoyub getdiyi ərzaqlarla qidalanıb və gecələr gizli yerlərdə sığınaraq sağ qalmağa çalışıb. Tapıldıqdan sonra ilkin tibbi müayinə üçün UMKE (Milli Tibbi Xilasetmə Qrupu) əməkdaşlarına təhvil verilib.

Telegramda izləyin