Vətəndaşlar narahatdır! Dənizə girən yanıqlarla çıxır!

Antalya və ümumilikdə Aralıq dənizi sahillərində dəniz suyuna girənlərdə dəri problemləri artıb.

Sonxeber.az türk mediasına istinadən xəbər verir ki, Antalya başda olmaqla Aralıq dənizi sahillərində dənizə girən bir çox vətəndaş son günlərdə dəri yanması, qaşınma və qızartı şikayətləri ilə xəstəxanalara üz tutub. Mütəxəssislər bu narahatlıqların səbəbi kimi artan temperatur fonunda dəniz suyunda zərərli mikroorqanizmlərin çoxalmasını göstərir.

Hazırda Antalyada havanın temperaturu 45 dərəcəyə, dəniz suyunun temperaturu isə 31 dərəcəyə çatıb. Bu qeyri-adi temperatur dəyişikliyi dəniz ekosisteminə mənfi təsir göstərərək, mikroorqanizmlərin sürətlə çoxalmasına səbəb olub.

Xəstəxanalara axın edənlər çoxalıb

Ekol TV-nin məlumatına görə, Antalyada dənizə girən bir çox şəxs dərilərində qaşınma, qızartı və sızanağa bənzər reaksiyalar səbəbilə tibb müəssisələrinə müraciət edib. Şikayətlər əsasən uşaqlarda və həssas dəriyə malik insanlarda daha sıx müşahidə olunur.

Bir vətəndaş yaşadığı vəziyyəti belə təsvir edib:

"Dənizə girdikdən sonra bədənimdə yanma və qaşınma başladı. Belimdə və qollarımda sızanağa bənzər qızartılar yarandı."

Mütəxəssisdən xəbərdarlıq: Şamandıra iplərinə diqqət

Akdeniz Universitetinin müəllimi, professor Mehmet Gökoğlu bildirib ki, yüksək temperatur dəniz suyunun keyfiyyətini aşağı salır. Onun sözlərinə görə, xüsusilə dənizdə uzun müddətdir qalan şamandıra ipləri və mantar baryerlər üzərində toplanan mikroorqanizmlər insan dərisi ilə təmasda olduqda elektrik çarpmasına bənzər yanma hissi yarada bilər.

Gökoğlu vətəndaşlara, xüsusilə uşaqlara və həssas dərisi olan şəxslərə dənizdə bu cür obyektlərdən uzaq durmağı tövsiyə edib.

Telegramda izləyin