Boşanma ərəfəsində olan qadın əri tərəfindən qətlə yetirildi – Qatilin son paylaşımı görün nə olub...

Trabzonun Beşikdüzü rayonunda 27 yaşlı Sinem S., boşanma ərəfəsində olduğu həyat yoldaşı tərəfindən evinə balkondan girilərək silahla qətlə yetirilib. Qatilin cinayətdən qısa müddət əvvəl etdiyi sosial media paylaşımı isə böyük kədər doğurub.

Sonxeber.az türk mediasına istinadən xəbər verir ki, hadisə dünən saat 22:40 radələrində Adacık məhəlləsində baş verib. Ali Eren S. (30) boşanma ərəfəsində olduğu həyat yoldaşı Sinem S.-nin birinci mərtəbədə yerləşən evinə balkondan daxil olub. Cütlük arasında başlayan mübahisə zamanı kişi silahla atəş açıb.

Silah səslərini eşidən qonşular polis və təcili tibbi yardım çağırıb. Hadisə yerinə gələn bir mühafizəçiyə də atəş açan Ali Eren S. qaçaraq hadisə yerindən uzaqlaşıb. Yaralanan Sinem S. və mühafizəçi xəstəxanaya çatdırılıb. Həkimlərin bütün müdaxilələrinə baxmayaraq qadın həyatını itirib. Qasıq nahiyəsindən yaralanan bekçinin vəziyyətinin isə yaxşı olduğu bildirilib.

Cinayətdən öncə Sinem S.-nin sosial media hesabında yazdığı sözlər böyük sarsıntı yaradıb:
"Çox sadədir: heyvanları öldürməyəcəksən, meşələri yandırmayacaqsan, qadınlara və uşaqlara zərər verməyəcəksən, qəlb qırmayacaqsan. Adam kimi yaşayıb, ölüb gedəcəksən. İnsan olmaq bu qədər sadədir"

Məlum olub ki, Ali Eren S. hadisədən 6 gün əvvəl sosial şəbəkədə bu mesajı paylaşıb:

"Qulağınıza sırğa olsun. Ali Eren S. heç nəyi yarım qoymaz. Ona edilən haqsızlıq nə unudular, nə bağışlanar. Sakit qaldığını sananlar bilsin ki, o sadəcə zamanı gözləyir. Çünki Ali Eren üçün intiqam tələsməz. Haq yerini tapmayınca içi soyumaz."

Bu paylaşım cinayətin planlı şəkildə törədildiyini üzə çıxarıb. Hadisədən sonra qaçan şübhəlinin tutulması üçün polis əməliyyatlara davam edir.

Telegramda izləyin