Metroda tüfənglə gəzən dovşan kostyumlu şübhəlinin ifadəsi ortaya çıxdı - VİDEO

İstanbulun Sarıyer rayonunda yerləşən Hacıosman Metro Stansiyasında dovşan kostyumunda və əlində tüfənglə gəzən bir şəxsin görüntüləri sosial şəbəkələrdə yayılıb.

Sonxeber.az türk mediasına istinadən xəbər verir ki, görüntüləri görən vətəndaşlar təşvişə düşərək polisə məlumat veriblər.

İlkin araşdırmalar nəticəsində şübhəlinin 15 yaşlı A.Y. olduğu müəyyən edilib. Onun Hacıosman Metro Stansiyasından çıxaraq Sarıyerin Cumhuriyet məhəlləsi istiqamətinə hərəkət etdiyi məlum olub. Sarıyer Rayon Polis İdarəsinin əməkdaşları tərəfindən aparılan əməliyyat nəticəsində A.Y. maskalı halda Araba Yolu Caddesi yaxınlığındakı metro stansiyasında saxlanılıb.

Araşdırmalar zamanı A.Y.-nin əlindəki tüfəngin taxtadan hazırlanmış oyuncaq silah, üzündəki maskanın isə oyuncaq dovşan maskası olduğu ortaya çıxıb. Onun barəsində "ümumi təhlükəsizliyi qəsdən təhlükəyə atmaq" maddəsi ilə hüquqi prosedur başlanılıb.

İfadəsi alınan A.Y., "Ayazağada maskalı bir partiyə qatıldım. Parti bitdikdən sonra evə qayıtmaq üçün metroya mindim. Əlimdəki silah taxtadan hazırlanmış oyuncaqdır," – deyə bildirib.

Hazırda məsələ ilə bağlı istintaq davam edir.

Telegramda izləyin