Haqqsız yerə 7 il həbsdə saxlanılan həkimə 2,5 milyon TL təzminat ödəniləcək

Van şəhərində mikrocerrahi şöbəsində əl cərrahı kimi çalışan həkim B.K.-nın həyatı 2009-cu ildə baş verən hadisə ilə alt-üst olub.

Sonxeber.az türk mediasına istinadən xəbər verir ki, Hakkariyə getmək üçün yola çıxmaq istəyən həkim avtomobil qəzası səbəbindən maşını özü idarə edə bilməyib və bir xəstə yaxınından kömək istəyib. İ.A.-nın idarə etdiyi və həkimin sərnişin olduğu avtomobil Hakkari girişində polis tərəfindən saxlanılıb. Axtarış zamanı maşından 33 kiloqram 270 qram narkotik vasitə tapılıb.

Sürücü İ.A. ifadəsində "Narkotik mənə məxsusdur, həkimin hadisə ilə əlaqəsi yoxdur" desə də, həm özü, həm də həkim B.K. "narkotik ticarəti etmək" ittihamı ilə həbs edilib. Məhkəmə həkimin təqsirsiz olduğuna inanmayaraq 2009-cu ildə ona 16 il 8 ay həbs cəzası verib.

15 iyul çevriliş cəhdindən sonra işə baxan prokuror, hökm çıxaran hakimlər və qərarı təsdiqləyən Yargıtay üzvləri FETÖ ilə əlaqəli olduqları üçün vəzifədən kənarlaşdırılıb. Bu inkişaflardan sonra həkimin vəkili Polat Balkan 2017-ci ildə yenidən məhkəmə araşdırması üçün müraciət edib.

Nəticədə B.K. 13 fevral 2017-ci ildə azadlığa buraxılıb. O, ümumilikdə 7 il 1 ay 16 gün həbsdə qalıb. Azadlığa çıxdıqdan sonra dövlətə qarşı 3 milyon TL-lik mənəvi təzminat tələbi ilə məhkəməyə müraciət edib. Məhkəmə həkimə haqsız həbsə görə 1 milyon TL və bu məbləğin 2009-cu ildən bəri işləyən yasal faizləri ilə birlikdə ödənilməsinə qərar verib.

Faizlərlə birlikdə təzminatın ümumi məbləği təxminən 2,5 milyon TL-yə çatıb. Həkim B.K.-nın hazırda Qaziantep Şəhər Xəstəxanasında çalışdığı bildirilib.

Telegramda izləyin