Görənlər gözlərinə inana bilmir! Evdən pişik ölçüsündə canlı tapıldı

İngiltərənin Eston bölgəsində yerləşən bir evdə təxminən 55 santimetr uzunluğunda, pişik ölçülərində nəhəng siçan tutulub.

Sonxeber.az türk mediasına istinadən xəbər verir ki, hadisə bölgə sakinlərini təəccübləndirib və rəsmi qurumlar bunun təkcə bir dəfəlik hadisə olmadığını, sürətlə böyüyən ciddi problemə çevrildiyini bildiriblər.

Eston Bölgə Şurasının üzvləri David Taylor və Stephen Martin, 28 iyul tarixində sosial mediada paylaşdıqları açıqlamada evdə tapılan bu nəhəng gəmiricinin ölçülərinin kiçik bir pişiyi xatırlatdığını qeyd ediblər. Onlar bölgədəki siçan istilasının hər keçən gün daha böyük təhlükəyə çevrildiyini vurğulayaraq belə deyiblər:

"Bu problem görməzlikdən gəlinir və getdikcə böyüyür. Artıq sadəcə tövsiyə verməklə kifayətlənmək olmaz, konkret tədbirlər görülməlidir."

Rəsmilər xatırladıb ki, bölgədə iki il əvvəl də oxşar siçan problemi yaşanıb və həmin vaxtdan bəri risk daha da artıb. Dərmanlama şirkətləri isə siçanların sürətlə çoxaldığını, xüsusilə kanalizasiya və tullantı sahələrində yaşayan bu növlərin ciddi xəstəlik daşıma təhlükəsi yaratdığını bildirib.

Hazırda yerli hakimiyyətin bölgədə təmizlik və dezinfeksiya tədbirlərini gücləndirmək üçün işlər apardığı, sakinlərin isə daha geniş miqyaslı tədbirlərin görülməsini tələb etdiyi açıqlanıb.

Telegramda izləyin