Təhlükəli sosial media trendləri: influencer ana video çəkmək istəyərkən onurğasını sındırdı

Rusiyanın Yekaterinburq şəhərində yaşayan 32 yaşlı influencer ana Mariana Barutkina sosial mediada yayılan "Stiletto Challenge" adlı təhlükəli trendə qatılmaq istəyərkən ağır xəsarət alıb.

Sonxeber.az türk mediasına istinadən xəbər verir ki, hadisə zamanı onurğasında kompressiya sınığı yaranan Barutkinanın üç ay ərzində xüsusi tibbi korset taxacağı bildirilib.

Nicki Minaj-ın High School klipindən ilhamlanan bu təhlükəli trenddə iştirakçılar hündür dabanlı ayaqqabılarla riskli balans hərəkətləri edirlər. Barutkina çəkiliş zamanı bir bankanın üzərinə çevrilmiş qazan qoyaraq dabanlı ayaqqabı ilə poza verməyə çalışıb, lakin tarazlığını itirərək kürəyi üstə yerə yıxılıb və ağır yaralanıb.

Doğuşdan cəmi səkkiz həftə sonra belə riskə gedən Barutkina, hadisədən sonra "Blog açmağa qərar verdim, bu ilk çəkilişim idi, indi isə həkim rəyi ilə evə dönürəm. Həyat bəzən insanı ən gözlənilməz anda sınağa çəkir," – deyə açıqlama verib.

Hadisənin görüntüləri sosial mediada qısa zamanda yayılıb və bir çox istifadəçi influencer ananı şöhrət naminə həm öz sağlamlığını, həm də körpəsini təhlükəyə atmaqda ittiham edib. Şərhlər arasında "İroniyadır, karmadır, yoxsa sadəcə axmaqlıq?", "32 yaşına çatıb uşaq sahibi olmusan, amma hələ də ağıllanmamısan" kimi sərt tənqidlər yer alıb.

Tənqidlərə cavab olaraq Barutkina, "Yanımda iki baxıcı var, körpəm güvəndədir. Bir video ilə məşhurlaşdım, indi isə tövsiyələrə əməl edirəm və yaxşıyam. Çəkiliş zamanı baxıcılardan biri uşağımın yanında idi," – deyə bildirib.

Bu hadisə, ötən günlərdə Rusiyada iki influencerın Ukraynaya hücum zamanı alovlanan neft obyektinin qarşısında TikTok videosu çəkdiklərinə görə həbs edilməsindən sonra baş verən ən son sosial media qalmaqalı kimi diqqət çəkib.

Telegramda izləyin