Gənc moda dizayneri lüks gəmidə müəmmalı şəkildə ölüb

ABŞ-ın Nyu-York ştatının məşhur istirahət məkanı Hamptonsda faciəvi hadisə baş verib.

Sonxeber.az xarici mediaya istinadən xəbər verir ki, Montauk gəmi Klubunda dayanmış "Ripple" adlı lüks gəmidə 33 yaşlı irlandiyalı moda dizayneri Martha Nolanın cansız bədəni tapılıb. Gənc qadının ölüm səbəbi hələ də dəqiqləşməyib.

Hadisə ilə bağlı polisin verdiyi məlumata görə, gecə saatlarında 911 xidmətinə təcili zəng daxil olub. Zəng edən şəxs gəmidə huşsuz halda bir qadının olduğunu bildirib. Hadisə yerinə çatan təcili tibbi yardım qrupları Marthaya ilkin yardım göstərməyə çalışsa da, onu xilas etmək mümkün olmayıb.

Hadisə şahidlərinin sözlərinə görə, gecə gəmidən çığırtılar eşidilib. Gəminin sahibi olduğu düşünülən bir kişi "O, mənim sevgilimdir!" deyərək kömək istəyib.

İlkin ekspertiza nəticələrinə əsasən, Marthanın bədənində zorakılıq izlərinə rast gəlinməyib. Lakin ölüm səbəbinin dəqiq müəyyənləşməsi üçün əlavə tibbi testlərin aparılacağı bildirilib. Məsələ ilə bağlı istintaq davam edir və cinayət işlərinə baxan xüsusi detektivlər də araşdırmaya cəlb olunub.

Qeyd edək ki, Martha Nolan "East x East" adlı dəbdəbəli geyim markasının və uniseks üslubda daha münasib qiymətli "Duper" brendinin yaradıcısı idi. Sosial şəbəkələrdə lüks həyat tərzi ilə tanınan dizayner tez-tez özəl təyyarələrlə səyahət etdiyi, bahalı hotellərdə qaldığı və helikopterlə istirahətə yollandığı görüntüləri paylaşırdı. TikTok-da yayımladığı son videoda isə Montaukda açdığı pop-up mağazanı göstərərək "Hədəflərimə çatdım" deyə qeyd etmişdi.

Marthanın qəfil ölümü həm İrlandiyada, həm də moda dünyasında dərin hüzn doğurub. Onun iş ortağı Dylan Grace "Instagram" hesabında yazıb: "Birlikdə çox xəyallar qurduq, çox güldük. Səni tanımaq böyük bir xoşbəxtlik idi. Səni çox sevirəm, Mar"

İrlandiyanın Xarici İşlər Nazirliyi hadisəyə müdaxilə edib. Baş nazir Micheál Martin isə açıqlamasında deyib: "Gənc, istedadlı və yaradıcı bir qadını itirdik. Bu, ailəsi üçün izaholunmaz bir ağrıdır."

Marthanın böyüdüyü Carlow şəhərində isə insanlar sarsıntı içindədir. Yerli idarəçilər "Bütün dünya onun ayaqları altındaydı. Çox yazıq oldu" şərhlərini veriblər. Montauk Gəmi Klubunun üzvləri isə onu belə xatırlayıblar: "Hər kəs onu sevirdi. Həmişə gülümsəyən, pozitiv bir insan idi".

Telegramda izləyin