Maşının şüşəsinə yazdığı yazı hər kəsi şok etdi: "Qızıma haqqımı halal etmirəm"

Qızının ona haciz qoyduğunu iddia edən ata avtomobilini evinin qarşısına park edib sitem etdi

Türkiyədə ailədaxili mübahisə bu dəfə sosial mediada gündəmə gəlib.

Sonxeber.az türk mediasına istinadən xəbər verir ki, adı açıqlanmayan bir ata, qızının ona qarşı məhkəmə prosesi başladığını iddia edərək etirazını cəmiyyətin yaddaşında qalacaq şəkildə ifadə edib.

İddialara görə, ata illər boyu zəhmət çəkərək aldığı və yeganə gəlir mənbəyi olan avtomobili qızı tərəfindən qaldırılan iddia ilə əlindən alınıb. Bu hadisə ilə dərindən sarsılan ata, avtomobilini qızının yaşadığı evin qarşısına park edib və ön şüşəsinə duyğusal bir yazı yapışdırıb.

Sözügedən yazıda belə deyilir:

"55 il əziyyət çəkdiyim avtomobilimi qızımın evinin qarşısına park edirəm. Qızıma son sözüm budur. Qızıma haqqımı halal etmirəm."

Qısa müddətdə sosial şəbəkələrdə gündəm olan bu hadisə ictimaiyyətdə geniş müzakirələrə səbəb olub. Bəziləri atanın haqlı etirazını müdafiə edərkən, digərləri hadisənin yalnız bir tərəfin baxışı ilə təqdim edildiyini və daha çox detalın ortaya çıxmasının vacibliyini vurğulayıblar.

Hadisənin hüquqi və şəxsi tərəfləri ilə bağlı hələlik rəsmi bir açıqlama verilməyib.

Telegramda izləyin