Milyonçu ovçu bufalonun hücumuna məruz qalaraq həlak oldu

Cənubi Afrikada təşkil olunan dəbdəbəli safari turu faciə ilə nəticələnib.

Sonxeber.az türk mediasına istinadən xəbər verir ki, ABŞ-dan olan milyonçu ovçu Asher Watkins, Afrikanın ən təhlükəli heyvanlarından biri hesab edilən və "Qara Ölüm" ləqəbi ilə tanınan Cape bufalosunun hücumuna məruz qalaraq həyatını itirib.

52 yaşlı Watkins, Limpopo əyalətində yerləşən 50 min dönümlük Bambisana adlı ərazidə 10 min dollarlıq safari ov turuna qatılmışdı. Onunla birlikdə peşəkar ovçu və iz sürücü də olub.

Hadisə bazar günü sıx kolluqlar arasında baş verib. Təxminən 1,5 ton ağırlığında olan nəhəng buffalo, qəfil ortaya çıxaraq təxminən saatda 55 km sürətlə Watkins-ə hücum edib. Heyvanın sərt buynuz zərbələri nəticəsində ağır yaralanan Watkins hadisə yerində həyatını itirib. Buffalo-nun hücumdan sonra öldürülüb-öldürülmədiyi isə hələ də məlum deyil.

Hadisə ilə bağlı Coenraad Vermaak Safaris şirkətinin nümayəndəsi Hans Vermaak açıqlamasında bildirib:
"Müştərimiz və dostumuz Asher Watkins-in faciəvi ölümünü dərin kədərlə bildiririk. Bu, tamamilə gözlənilməz və təhrik olunmamış bir hücum idi. Ailəsinə bu ağır günlərdə dəstək veririk."

Watkins, ABŞ-ın Texas ştatında yerləşən və lüks fermalar satan Watkins Ranch Group şirkətinin sahibi idi və Dallas Safari Clubun üzvü kimi tanınırdı. Yaxın dostlarının sözlərinə görə, o, dünya miqyasında nadir ov tüfəngi kolleksiyasına sahib idi və ən çox sevdiyi insan isə qızı Savannah idi. 2013-cü ildə boşandığı həyat yoldaşı Courtney ilə qızlarının ortaq qəyyumluğunu paylaşırdılar. Watkins-in qəfil ölümü, xüsusilə Savannah üçün böyük bir sarsıntı olub.

Cape bufaloları, hər il Afrikada təxminən 200 insanın ölümünə səbəb olur və ovçular üçün ən ölümcül heyvanlardan biri sayılır. Onların çəkisi 1,5 tona qədər, uzunluğu 3,3 metrə, boyu isə 1,7 metrə çata bilir. Güclü sümük quruluşuna sahib geniş buynuzları, hücum anında ölümcül zərbələr endirməyə qadirdir.

Safari şirkətinin rəsmi internet saytında Cape bufalosu barədə belə xəbərdarlıq edilir:
"Cape bufalosu Afrikanın ən qorxulan ov heyvanıdır. Ov zamanı yaralansalar belə, sürətlə qarşı hücuma keçə bilər və böyük sürətlə üzərinizə gələ bilər. Bu heyvanı ovlamaq soyuqqanlılıq və yüksək diqqət tələb edir."

Bu faciəvi hadisə, safari turizminin daşıdığı təhlükələri bir daha gündəmə gətirərkən, Watkins-in ailəsi və dostları onun itkisi ilə sarsılıb.

Telegramda izləyin