15 yaşlı uşağın törətdiyi qətl böyük narkotik işi ilə əlaqələndirilir

Diyarbakırda baş verən və ilk baxışda ailədaxili zorakılıq kimi görünən bir qətl hadisəsinin, Türkiyədə böyük bir narkotik işi ilə əlaqəsi olduğu ortaya çıxanda ölkə gündəmini silkələyib.

Sonxeber.az türk mediasına istinadən xəbər verir ki, 15 yaşlı bir uşaq, xalası ilə evli olan keçmiş kənd mühafizəçisi Yüksel Bayrakı küçənin ortasında başından güllələyərək qətlə yetirib. Bu qətl, Bayrakın şahid qismində ifadə verəcəyi 24 nəfərlik narko-qruplaşma işi üzrə iddianamənin qəbul edilməsindən yalnız 5 gün əvvəl baş verib.

Hadisənin təfərrüatları:

Qətl ötən il Diyarbakırda baş verib. Yüksel Bayrak, ailəsi ilə birlikdə qohum ziyarətindən qayıdarkən küçədə pusquya düşür. Təhlükəsizlik kameralarının qeydə aldığı görüntülərdə 15 yaşlı uşağın Bayrakın arxasınca səssizcə yaxınlaşdığı, ilk atəş cəhdində silahın tutukluq etdiyi, ikinci cəhddə isə Bayrakı başından vuraraq öldürdüyü görünür. Bayrakın həyat yoldaşı hadisəyə müdaxilə etməyə çalışsa da, buna mane ola bilməyib. Cinayətkar hadisə yerindən uzaqlaşsa da, qısa müddət sonra saxlanılıb.

"Xalama pis davrandığı üçün öldürdüm" dedi, lakin…

Ekol TV-dən Burak Emekin xəbərinə görə, saxlanılan uşaq ilkin ifadəsində cinayəti "Halama pis davrandığı üçün" törətdiyini deyib. Lakin araşdırmalar dərinləşdikcə hadisənin əvvəlcədən planlaşdırılmış sui-qəsd ola biləcəyi ehtimalı önə çıxıb.

Narkotik işi və təşkilatlı qətl şübhəsi

Məlum olub ki, Yüksel Bayrak 24 nəfərin təqsirləndirildiyi genişmiqyaslı bir narkotik işi üzrə əsas şahidlərdən biri olub. Onun, iddianamənin hələ məhkəmə tərəfindən qəbul edilmədiyi bir vaxtda – cəmi 5 gün əvvəl qətlə yetirilməsi, cinayətin təsadüfi və şəxsi səbəblərlə törədilmədiyini ortaya qoyub.

Təhlükəsizlik orqanlarının apardığı genişmiqyaslı istintaq nəticəsində, aralarında azmettirmə ilə ittiham olunanların da yer aldığı 10 nəfər həbs edilib. Hüquq-mühafizə orqanları cinayətin arxasında duran təşkilatlanmanı sxematik şəkildə ortaya çıxarıb. Gözaltına alınan şəxslər haqqında artıq cinayət işi açılıb və onların 31 oktyabr tarixində məhkəmə qarşısına çıxarılması gözlənilir.

Bu hadisə, 15 yaşlı bir gəncin təkbaşına törətdiyi sadə bir qətl kimi görünsə də, arxasında narkotik mafiyasına bağlı daha dərin və təhlükəli əlaqələrin ola biləcəyini göstərir.

Telegramda izləyin