Məşhur reper konsertində körpəsi ilə gələn anaya etiraz etdi – sosial şəbəkədə müzakirələrə səbəb oldu

Kolumbiyalı reper Maluma, Meksikoda verdiyi konsertə körpəsi ilə gələn bir anaya sərt reaksiya göstərib.

Sonxeber.az xarici mediaya istinadən xəbər verir ki, təxminən 26 min tamaşaçının izlədiyi tədbirdə səhnədə mahnı ifa edən Maluma, körpəni fərq edərək musiqini dayandırıb və anaya "Bu çox məsuliyyətsizlikdir" deyə irad bildirib.

Sosial şəbəkələrdə yayılan görüntülərdə Maluma, körpənin yaşını soruşaraq belə deyib: "Bir yaşlı körpəni bu qədər yüksək səslə konsertə gətirmək doğrudurmu? O, burada nə etdiyini belə bilmir." Ardınca anadan körpənin qulaqlarını qorumasını istəyib: "Bu, sənin məsuliyyətindir."

Özünün də 1 yaşında Paris adlı qızı olan Maluma əlavə edib: "Mən ata olmuşam, belə bir şey heç vaxt etmərəm. Körpə burada olmaq istəmir, sən isə onu oyuncaq kimi yellədirsən" Konsertdə olan tamaşaçılar bu sözləri alqışlarla dəstəkləyib.

Lakin sosial şəbəkədə müzakirələr iki yerə bölünüb. Bir qrup istifadəçi Malumanın addımını alqışlasa da, bəziləri onun minlərlə insanın qarşısında ananı utandırmasını doğru hesab etməyib. Digərlər istifadəçilər isə körpəni konsertə gətirməyin yanlış olduğunu, əgər uşağa baxacaq kimsə yoxdursa, belə tədbirlərə getməməyin daha düzgün olduğunu qeyd ediblər.

Qeyd edək ki, Maluma hazırda Latın Amerikası, ABŞ və Avropanı əhatə edən "+Pretty +Dirty World Tour" qastrol turu çərçivəsində çıxışlarını davam etdirir.

Telegramda izləyin